Uyghurlarning mejburiy emgek mesiliside ittipaqdashlar amérika hökümitige egeshmekchi

Muxbirimiz eziz
2022.07.19
Share on WhatsApp
Share on WhatsApp

Amérika qoshma shtatliri (a q sh) ning ittipaqdashliri yéqinqi mezgillerde oxshimighan shekillerde Uyghur diyaridiki mejburiy emgek mehsulatlirini cheklesh sépige qoshuluwatqan bolup, emdilikte teminlesh zenjiridiki bu ehwalgha qarita “Gherezlik halda bilmes boluwélish” ning waqti ötkenliki algha sürülmektiken.

Roytérs agéntliqining 18-iyuldiki xewiride éytilishiche, Uyghur diyaridiki irqiy qirghinchiliqning muhim mezmunliridin bolghan mejburiy emgek mesilisige qaritilghan qanun layihesi ijra qilinishqa kirishkendin buyan amérika emgek ministirliqi öz ittipaqdashliridin yawropa ittipaqi we kanada bilen mexsus söhbette bolup, bu mesilide ularningmu tégishlik charilerni qollinishi heqqide muzakirileshken. Bu xil hemkarliq ishlirigha mes'ul amérika emeldarliridin si li (Thea Lee) bu heqte muxbirlargha söz qilip “Hazir bu ishlar kéngyiwatidu. Kanada, yawropa ittipaqi we bashqilar mushu yönilishke qarap méngiwatidu. Emdi bizge teminlesh zenjiri mesiliside ‛bu ishlargha chaqchaq qilmang‚ deydighan waqit keldi” dégen. Amérika tashqi ishlar ministiri antoni bilinkén ependimu iyun éyida amérika hökümitining mejburiy emgek mesiliside öz ittipaqdashliri bilen hemkarlishidighanliqini bildürgenidi.

Melum bolushiche, amérika tamozhna we chégra mudapi'e idarisi nöwette Uyghur diyaridiki mejburiy emgekke baghlinishliq bolghanliki mehsulatlarning hemmisini musadire qilmaqta iken. Emma quyash énérgiye taxtisi ishlepchiqiridighan xitay shirketliridin üchi hazirche bu “Qara tizimlik” ke élinmighan bolup, bu mesile amérika hökümiti jiddiy oylishiwatqan ishlardin iken. Si li bu heqte toxtilip emgek ministirliqining “Qara tizimliki” nöwette barghanséri zoriyiwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.