“гәнфең литий ширкити” ниң уйғур елида литий қазмақчи болуши уйғур мәҗбурий әмгики әндишини күчәйтти

Мухбиримиз ирадә
2022.07.21
Share on WhatsApp
Share on WhatsApp

Хитайдики әң чоң литий ишләпчиқарғучи ширкәт болған “гәнфең литий ширкити” ниң уйғур елида литий қезиш вә ишләпчиқириш үчүн тәкшүрүш хизмәтлиригә башлиши уйғур мәҗбурий әмгики мәсилисигә диққәт қиливатқан орун вә шәхсләрниң диққитини қозғиди. Мәзкур ширкәт BMW вә тесла (Tesla) ширкити қатарлиқ аптомобил ишләпчиқарғучиларни литий билән тәминләйдикән.

Блумберг гезитиниң хәвәр қилишичә, хитайниң “гәнфең литий ширкити” йеқинда дөләт қоллишидики тармақ ширкәтләр билән арқилиқ һәмкарлишип туруп, уйғур елида литий, никел вә башқа муһим метал байлиқлирини қезишни тезлитидиғанлиқини елан қилған болуп, мәзкур ширкәт гуруһиниң рәиси ли ляңбин бу йилниң бешида уйғур елини зиярәт қилип йәрлик һөкүмәт даирилири билән бу һәқтә сөһбәтләшкән икән.

Һалбуки, “гәнфең литий ширкити” ниң уйғур елида литий қатарлиқ қиммәтлик кан байлиқлирини ишләпчиқиришқа киришиши әслидила уйғур мәҗбурий әмгикигә четишлиқ, дәп әйиблиниватқан тесла қатарлиқ токлуқ аптомобил саһәсигә болған диққәтни йәниму ашурған.

Мәҗбурий әмгәк мәсилилирини тәкшүрүш вә мәслиһәт бериш ширкити болған “Horizon Advisory” ниң қурғучилириниң бири болған емилий дела бруйири ханим ( (Emily de La Bruyere мундақ дегән: “шинҗаңдин чиқидиған материялларни ишлитишниң токлуқ аптомобил саһәсигә кәлтүридиған хәтири наһайити чоң. Хитайдики барлиқ батарейә ишләпчиқириши американиң қанунлириға вә йәршариниң кишилик һоқуқни мәркәз қилған қаидилиригә хилап болуши мумкин. Хитайниң шинҗаңда токлуқ аптомобилға мунасивәтлик кәсипләрни давамлиқ бәрпа қилиши хәвпни күчәйтип маңиду.”

Хитайниң “гәнфең литий ширкити” блумберг гезитигә бәргән баянатида “өзлириниң хизмәтчиләрниң һоқуқини қоғдашқа әһмийәт беридиғанлиқини, йәнә келип уйғур елидики бу түрниң дәсләпки қәдәмдики издиниш басқучида икәнлики” ни тәкитләп: “кәлгүси тәрәққиятқа мас келидиған түрләрниң бар-йоқлуқи һазирчә ениқ әмәс” дегән.

Тесла ширкитиниң хитайдики вәкиллири бу һәқтә ипадә билдүрүшни рәт қилған, германийәниң BMW ширкити болса қайтурған җавабида гәнфең ширкитиниң өзлирини авистиралийәдики минадин литий билән тәминләйдиғанлиқини, һазирчә уйғур елидики иш пиланлири һәққидә өзлиригә хәвәр бәрмигәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.