Мәҗбурий әмгәкни байқут қилиш һәркити дуканларға йүзләнди

Уйғур дияридики мәҗбурий әмгәк һәққидә көплигән учурларниң ташқий дуняға ашкара болуши билән бир қисим пидайи яшлар америка вә явропадики магизинларға йүрүш қилип, херидарларниң виҗданиға бивастә соал қоюш усулини омумлаштурди.

Иҗтимаий таратқулардики син көрүнүшлиридин мәлум болушичә, бир қисим яшлар “банана җумһурийити”, “викторийәниң мәхпийәтлики”, “найки”, “зара” қатарлиқ хитайда ишлиниватқан дуняви маркилар тизилған дуканларға кирип, улардики баһа көрсәткүчлиригә “бу мәһсулат уйғурларниң мәҗбурий әмгики бәдилигә ишләнгән. Буни сетивалсиңиз қирғинчилиққа шерик болған болисиз” дегән хәтләр йезилған әскәртмиләрни чаплап чиққан. Бәзи маркиларниң янчуқлириға бу әскәртмиләрни селип қойған.

Франсийәниң париж шәһридә “париж яшлири килимат үчүн” гурупписидики франсийәлик яш-өсмүрләр өзлүкидин бу паалийәтни давамлаштуриватқан болса, бостон шәһридә уйғур алимә майсәм мутәллипова буни кеңәйтишкә күч чқармақта икән. 

Гәрчә уйғурларниң мәҗбурий әмгәклири һәққидә ахбарат вастилири көплигән мәлуматларни бәргән болсиму, авам хәлқ арисида бу һәқтики чүшәнчә һәммила кишигә мәлумлуқ һадисигә айлинип кетәлмигән. Гәрчә бу қетимқи паалийәтниң көлими анчә чоң болмисиму, әмма бу җәһәттә бир йеңилиқ болуш сүпити билән техиму көп кишиләрниң диққитини бу мәсилигә җәлп қилиш ролини ойниши үмид қилинмақта икән.