Chet'elliklerning Uyghurlar diyaridiki mejburiy emgekni cheklesh namayishliri dawam qilmaqta

Muxbirimiz eziz
2020-09-22
Élxet
Pikir
Share
Print

Uyghurlar diyaridiki mejburiy emgek we lagérlar mesilisi dunya jama'itige köplep melum bolush bilen birge "21-Esirdiki zamaniwi qulluq" dep tenqidliniwatqan bu qebihlikni cheklesh namayishliri herqaysi memliketlerde arqimu-arqidin otturigha chiqishqa bashlidi.

20-Séntebir küni dunyawi xaraktérdiki "Halaket isyani" teshkilati gollandiyening amstérdam shehiride namayish ötküzüp, Uyghurlar diyaridiki mejburiy emgekke xatime bérishni telep qildi. Namayishchilar yawropadiki eng chong kiyim-kéchek parche sétish shirkiti bolghan C&A shirkitining amstérdam shehiridiki dukini aldigha toplinip "Uyghur qirghinchiliqi toxtisun!", "Mejburiy emgek axirlashsun!" dégen mezmunlarda xitab qildi. Namayishni ‍uyushturghuchilar bu jeryanda Uyghurlar diyarida milyonlighan kishilerning lagérlargha qamilip, mejburiy emgekke séliniwatqanliqini, C&A shirkitining köpligen kiyim-kécheklirining mejburiy emgek arqiliq teyyarlan'ghanliqini, bu xil kiyim-kécheklerni sétiwélish we kiyishning emeliyette ashu xil qebihlikke shérik bolghanliqqa barawer ikenliki, bu xil qebihlikni axirlashturushning texirsizliki qatarliq témilar boyiche ünlük nutuq sözlidi. Shuning bilen birge namayishchilar yene dukanning eyneklik tamlirigha "Uyghurlargha erkinlik" dégendek jümlilerni pürkime sir bilen yézip chiqti.

Uyghurlarni qollash mezmunidiki bu xil namayishning yene biri 22-séntebir küni kanadaning ottawa shehiridiki xitay bash elchixanisi aldida ötküzüldi. Bu namayishni teshkilligüchiler shu jaydiki yehudiy jama'iti bolup, ular qollirida "Emdi qaytilanmaydu" dégen sho'ar yézilghan bayraqlarni kötürüwalghanidi. Ottawa shehiride olturushluq bir qisim Uyghurlarmu "Sherqiy türkistan jumhuriyiti bayriqi" ni kötürgen halda namayishqa qatnashti.

Melum bolushiche, eyni waqitta bu xil mejburiy emgek we jaza lagérlirigha mehkum bolushning derdini köp tartqan yehudiy jama'itining nöwette ashu xil qismetlerge duch kéliwatqan Uyghurlarni qollash namayishi köpligen dölet we sheherlerde ötküzülmektiken.

Toluq bet