"Uyghurlardiki mejburiy emgekni cheklesh qanuni" awam palatasida maqullandi

Muxbirimiz eziz
2020-09-22
Élxet
Pikir
Share
Print

Uyghur diyaridiki mejburiy emgek mesilisi yéqindin buyan amérika hökümitining küchlük tenqidige uchrap kelgenidi. 22-Séntebir küni chüshtin kéyin amérika dölet mejliside muzakire qiliniwatqan "Uyghurlariki mejburiy emgekni cheklesh qanun layihesi" amérika awam palatasida 3 ke qarshi 406 awaz bilen maqullandi.

Mezkur qanun layihisi kéngesh palatasidinmu maqullinip resmiy qanun'gha aylansa xitayning amérikagha éksport qilidighan herqandaq mehsulati mejburiy emgekke chétishliq emeslikini ispatlap bergüchi yéterlik delil-spatlar bolmighan ehwalda amérika tamozhnisida musadire qilinidiken.

Dunya Uyghur qurultiyining re'isi dolqun eysa buning Uyghur dawasidiki bir muhim ghelibe ikenlikini tekitlesh bilen birge mezkur qanun layihesiningmu kéyinki basquchlardin ongushluq ötüp kétishige zor ishenchi barliqini, bu qanun layihesining xitay hökümiti ijra qiliwatqan "Uyghurlarni zamaniwi qullargha aylandurush" herikitini chekleshte ijabiy rol oynaydighanliqini bildürdi.

Washin'gton shehiridiki Uyghur kishilik hoquq qurulushi teshkilati bu munasiwet bilen amérika awam palatasining bu heqqaniy herikiti üchün özlirining teshekkürini ipadilidi. Mezkur teshkilatning diréktori ömer qanat bu heqe söz qilip "Bu xewer dunyadiki Uyghurlar üchün bir zor xushxewer bolghusi" dédi. Mezkur qanun layihesini awazgha qoyush ishigha yéqindin tirishchanliq körsitiwatqan amérika dölet mejlisi ezasi kristofér simis ependi bu heqte toxtilip: "Nöwettiki ishlar shübhisizki shi jinping ijra qiliwatqan birmeydan qirghinchiliqtur" dédi.

Buningdin ilgiri "Uyghur kishilik hoquq siyasiti qanuni" amérika awam we kéngesh palatalirining mutleq üstün awaz bilen maqullishi hemde amérika prézidénti donald trampning imza qoyushi bilen amérika hökümiti élan qilghan Uyghurlar heqqidiki tunji qanun bolup qalghanidi. Nawada

"Uyghurlardiki mejburiy emgekni cheklesh qanun layihesi" mu ongushluq halda resmiy qanun'gha aylansa amérika hökümiti élan qilghan bu heqtiki ikkinchi qanun bolup qalidiken.

Toluq bet