Xitay hökümiti Uyghurlarning mejburiy emgekke séliniwatqaniqini perdazlashqa urunmaqta

Muxbirimiz irade
2020-09-24
Élxet
Pikir
Share
Print

Xitay hökümet taratquliri Uyghurlarning mejburiy emgekke séliniwatqanliqini ret qilidighan teshwiqat herikitini kücheytken. Buning del amérika awam palatasida awazgha qoyulghan "Uyghurlardiki mejburiy emgekni cheklesh qanun" layihesi 3 ke qarshi 406 awaz bilen maqulluqtin ötken mezgilge toghra kélishi diqqet qozghidi.

Xitayning shinxu'a tori 24-séntebir küni xotendiki zawut we séxlarda Uyghurlarning "Xushal-xuram" ishlewatqanliqini teshwiq qilidighan bir parche süretlik xewer tarqitip, gherbtiki kishilik hoquq organliri mejburiy emgek dep teswirlewatqan bu körünüshlerni "Namratliqtin qutuldurush", "Kesipler tereqqiyati" dégen sözler bilen süpetligen. Shinxu'a tori xewiride "Shinjang shinjangning jenubini merkez qilip turup namratliqtin qutuldurush qurulushini zor küch bilen tereqqiy qildurdi, téximu köp zawut we séxlar namrat rayonlardiki kishilerning'ishiki'aldida échiwétildi. Nurghun namrat a'ililer yéqin etrapta muwapiq xizmet tapti. Namratlarning qilidighan ishi we kirimi bar boldi" dégen.

Eksiche, chet'ellerdiki Uyghur közetküchiler buni jenubta yenimu köp kishining zawut-karxanilarda intayin töwen heq bilen mejburiy halda qul emgikige séliniwatqanliqining ipadisi, dep qarimaqta.

Xitay hökümitining Uyghurlargha qaratqan mejburiy emgek tüzümi hazir eng küchlük ghulghula qozghawatqan mesile bolup qaldi. Uyghur mejburiy emgikidin payda élishni cheklesh üchün yenimu köp hökümetler we dangliq markilargha bésim shekillendürülmekte.

Toluq bet