Мәҗбурий әмгәккә четишлиқ метро қурулуши австралийәдә зор ғулғула қозғиди

Мухбиримиз әзиз
2021-09-28
Share

"бүгүнки ғәрбий австралийә" гезитиниң 28-сентәбирдики хәвиридә ейтилишичә, ғәрбий австралийәдики аммиви қатнаш даирилири йеқинда хитайдин сетивалмақчи болған бир милярт америка доллирилиқ метро пойези тохтамини бикар қилиш һәққидә тәклип тәйярлиған. Шуниңдәк тәклиптә ениқ қилип: "бу малларниң тәйярлиниши уйғурларниң мәҗбурий әмгикигә четишлиқ болғанлиқи үчүн бу тохтамни инавәтсиз қилиш керәк," дегән. Әмма бу тәклипни қатнаш министирликидики бәзи кишиләр "бәк балдур хуласә чиқириветилгән" дегән баһанә билән австралийә қатнаш министири рита саффйониң қолиға тапшурмиған.

Хәвәрдә ейтилишичә, бу қетимқи метро қурулушиға лазимлиқ пойезларни ишләпчиқиришқа хитайниң җяңсу өлкисидики "KTK" гуруһи мәсул болған болуп, бу ширкәт америка һөкүмити 2020-йили елан қилған "уйғур дияридики мәҗбурий әмгәккә четишлиқ ширкәтләр" қара тизимликидә бар икән. Бу қетимқи тохтамни бикар қилиш мәсилиси тоғрисида сөз болғанда мәзкур ширкәтниң вәкили "бизниң хизмәтчилиримиз хитайдики әмгәк тохтами бойичә өзлүкидин ишқа киргән хизмәтчиләр. Биздә мәҗбурий әмгәк һадисиси мәвҗут әмәс" дәп турувалған. Австралийә қатнаш министирлиқи болса метро пойезини башқа ширкәттин сетивелишниң бәкла қиммәт чүшүши түпәйлидин бу һәқтики әһвалларни министирға мәлум қилмиған.

Нөвәттә бу әһвал ахбарат вастиси арқилиқ мәлум болғандин кейин, австралийәдә зор ғулғулиға сәвәб болған. Шуниң билән биргә "KTK" гуруһиниң өткән бирнәччә йилда нилқа наһийәсидин аз дегәндиму 80 нәпәр ишчини завутта ишләткәнлики, уларниң "йеңидин хизмәткә орунлаштуруп намратлиқтин қутулдуруш" намида төт миң километирдин ошуқ мусапини бесип җяңсуға кәлгән ишчилар икәнлики ашкара болған.

Мәлум болушичә, австралийә һөкүмити 2018-йили мақуллиған "заманиви қуллуқни мәний қилиш қануни" ға бинаән бу хилдики мәһсулатларниң австралийәгә импорт қилиниши чәклинидикән. Нөвәттә бу мәсилә австалийә һөкүмити җиддий музакирә қиливатқан мәсилиләрниң бири болуп қалмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт