Mejburiy emgekke chétishliq métro qurulushi awstraliyede zor ghulghula qozghidi

Muxbirimiz eziz
2021-09-28
Share

"Bügünki gherbiy awstraliye" gézitining 28-séntebirdiki xewiride éytilishiche, gherbiy awstraliyediki ammiwi qatnash da'iriliri yéqinda xitaydin sétiwalmaqchi bolghan bir milyart amérika dolliriliq métro poyézi toxtamini bikar qilish heqqide teklip teyyarlighan. Shuningdek teklipte éniq qilip: "Bu mallarning teyyarlinishi Uyghurlarning mejburiy emgikige chétishliq bolghanliqi üchün bu toxtamni inawetsiz qilish kérek," dégen. Emma bu teklipni qatnash ministirlikidiki bezi kishiler "Bek baldur xulase chiqiriwétilgen" dégen bahane bilen awstraliye qatnash ministiri rita saffyoning qoligha tapshurmighan.

Xewerde éytilishiche, bu qétimqi métro qurulushigha lazimliq poyézlarni ishlepchiqirishqa xitayning jyangsu ölkisidiki "KTK" guruhi mes'ul bolghan bolup, bu shirket amérika hökümiti 2020-yili élan qilghan "Uyghur diyaridiki mejburiy emgekke chétishliq shirketler" qara tizimlikide bar iken. Bu qétimqi toxtamni bikar qilish mesilisi toghrisida söz bolghanda mezkur shirketning wekili "Bizning xizmetchilirimiz xitaydiki emgek toxtami boyiche özlükidin ishqa kirgen xizmetchiler. Bizde mejburiy emgek hadisisi mewjut emes" dep turuwalghan. Awstraliye qatnash ministirliqi bolsa métro poyézini bashqa shirkettin sétiwélishning bekla qimmet chüshüshi tüpeylidin bu heqtiki ehwallarni ministirgha melum qilmighan.

Nöwette bu ehwal axbarat wastisi arqiliq melum bolghandin kéyin, awstraliyede zor ghulghuligha seweb bolghan. Shuning bilen birge "KTK" guruhining ötken birnechche yilda nilqa nahiyesidin az dégendimu 80 neper ishchini zawutta ishletkenliki, ularning "Yéngidin xizmetke orunlashturup namratliqtin qutuldurush" namida töt ming kilométirdin oshuq musapini bésip jyangsugha kelgen ishchilar ikenliki ashkara bolghan.

Melum bolushiche, awstraliye hökümiti 2018-yili maqullighan "Zamaniwi qulluqni men'iy qilish qanuni" gha bina'en bu xildiki mehsulatlarning awstraliyege import qilinishi cheklinidiken. Nöwette bu mesile awstaliye hökümiti jiddiy muzakire qiliwatqan mesililerning biri bolup qalmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet