Amérika shirkitining xitaydiki zawutlirida Uyghur mejburiy emgekchiliri barliqi ashkarilandi

Muxbirimiz irade
2021-10-07
Share

Royـtérs agéntliqining 7-öktebir élan qilghan mexsus xewerdin melum bolushiche, amérikadiki tézginek yasap satidighan "Uniwérsal iliktoron mehsulatliri" (Universal Electronics) shirkiti yüzligen Uyghur ishchisini xitayning jenubidiki chinjow shehirige jaylashqan zawutida ishleshke yötkesh heqqide Uyghur éli da'iriliri bilen kélishim tüzgen. Mezkur shirketning buni özi roytérs agéntliqigha delilligen bolup, bu amérika shirkitining mejburiy emgekke chétilghanliqigha a'it tunji delillen'gen weqe iken.

Melum bolushiche, bu tézginek shérkiti soniy, samsung we mikrosoft, LG qatarliq xelq'araliq téléwizor we téxnika shirketlirini tézginek bilen teminleydighan shirket bolup, ularning az dégende 400 neper Uyghur ishchini yallighanliqi we bu ishchilarning xoten shehiridin kelgenliki ashkarilan'ghan.

"Unwérsal iliktoron mehsulatliri" shirkitining roytérs agéntliqigha dep bérishiche, shirketning chinjowdiki zawutida hazir 365 neper Uyghur ishchisi ishleydiken. Biraq shirket bu Uyghur ishchilarning bashqa xitay ishchilargha oxshash mu'amilidin behriman bolidighanliqini, ulargha mejburiy emgekchi qatarida mu'amile qilinmaydighanliqini ilgiri sürgen.

Halbuki, chinjuw we Uyghur rayonidiki yerlik emeldarlarning sözliri hemde hökümet uqturushi we yerlik taratqularning xewiridin ashkarilinishiche, bu Uyghur ishchilar xoten shehiridin chénjudiki zawutqa saqchilarning bashqurushida ayropilan arqiliq yötkelgen we yötkesh heqqini Uyghur rayonluq hökümet da'iriliri töligen iken. 2020-Yili 2-ayda chinjow saqchisining ijtima'iy alaqe hésabatigha yollan'ghan uqturushtimu buning rastliqi ispatlan'ghan.

Chinjow shehirining hökümet uqturushi we yerliktiki dölet taratqulirida élan qilin'ghan bir qisim xewerlerdinmu bu zawuttiki Uyghur ishchilarning dawamliq saqchilarning nazariti astida ishleydighanliqi melum bolghan bolup, mezkur xewer élan qilin'ghandin kéyin zor inkas qozghidi.

Xitay tashqiy ishlar ministirliqi roytérs agéntliqining bu heqtiki ziyaret telipini ret qilish bilen birge, Uyghurlargha mejburiy emgek siyasiti yürgüziwatqanliqini inkar qilghan. Amérika tashqiy ishlar ministirliqi eger shundaq bolghan teqdirde, buning amérikaning mejburiy emgek we adem etkeschilikige munasiwetlik qanunlirigha xilap ikenlikini bildürgen. Uyghur aptonom rayonluq hökümet buninggha téxi inkas qayturmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet