Amérika kéngesh palata ezaliri xitaydiki zawutida Uyghurlarni ishletken amérika shirkitidin tepsiliy uchur bérishni telep qilghan

Amérikadiki her ikki partiyedin bolghan bir qisim kéngesh palata ezaliri yéqinda xitaydiki zawutlirida Uyghur mejburiy emgekchiliri barliqi ashkarilan'ghan amérika shirkitige xet yézip, bu shirketning Uyghurlargha qiliniwatqan zulumgha chétilip qalghanliqigha da'ir endishilirini bayan qilghan.

Roytérs agéntliqining xewirige qarighanda, kéngesh palata ezasi bob ménéndéz bilen jéf mérkléy we marko rubiyo qatarliqlar arizona shitatigha jaylashqan “Unwérsal éliktoron mehsulatliri” shirkitining bash ijra'iye re'isi pa'ul arlinggha yazghan xétide mundaq dégen: “Shirket zawutlirida ishlewatqan Uyghurlarning shara'itliridin ularning mejburiy ishlitiliwatqanliqini körsitip béridighan roshen alametler tursimu, shirketning buni tekshürüsh we tüzitish üchün bir heriket qollanmighanliqi bizni tolimu epsuslandurdi we endishige saldi.”

Yéqinda roytérs agéntliqi amérikadiki tézginek yasap satidighan “Uniwérsal éléktoron mehsulatliri” shirkitining xitayning chinjow shehirige jaylashqan zawutida xotendin yötkep kélin'gen 400 ge yéqin Uyghur barliqini we bu Uyghurlarni yötkesh üchün ularning Uyghur rayonluq da'iriler bilen toxtam tüzgenlikini ashkarilighan idi. Eyni chaghda shirket bu ishchilarni bir wastichi arqiliq yötkigenlikini éytqan bolsimu. Emma bu wastichining kimlikini ashkarilimighan idi.

Bu shirket bkéngesh palata ezalirining xétige qayturghan inkasida, özlirining bu Uyghur ishchilarni ekeldürüp bergen wastichi shirket bilen munasiwitini üzgenlikini we dölet mejlis ezaliri bilen bu heqte hemkarlishidighanliqini bildürgen.

Yuqiriqi kéngesh palata ezaliri “Uniwérsal éléktron mehsulatliri” shirkitidin 11-ayning 5-künidin burun özlirige 2019-yili bu Uyghurlarni yallash üchün tüzülgen toxtamning toluq tékisti, ularning sani qatarliq melumatlarni ewetip bérishni telep qilghan.