Рубио қатарлиқлар хәлқара малийә тәрәққият оргинидин уйғур мәҗбурий әмгикигә четишлиқ қуяш енергийә тахтилирини сориған

Мухбиримиз әркин
2021-11-05
Share

Америка кеңәш палатасиниң марку рубиони өз ‍ичигә алған 6 нәпәр җумһурийәтчи әзаси америка хәлқара малийә тәрәққият оргининиң башлиқиға хәт йезип, уларниң уйғур мәҗбурий әмгикигә четишлиқ қуяш енергийә тахтилирини сетивалған-сетивалмиғанлиқи һәққидә җаваб беришни тәләп қилған. 4-Ноябир күни әвәтилгән бу хәттә, "американиң ирқий қирғинчилиқ вә мәҗбурий әмгәккә шерик болуп қалмаслиқиға капаләтлик қилиш дөләт мәҗлисиниң һалқилиқ муһим вәзиписи" икәнлики тәкитләнгән.

Хәттә көрситилишичә, мана бу немә үчүн "кеңәш палатасиниң 7-айда уйғур мәҗбурий әмгикиниң алдини елиш қанунини бирдәк мақуллиши, шундақла авам палатасиниң өткән йили буниңға охшаш бир қанун лайиһәсини мутләқ көп аваз билән мақуллишиниң сәвәби" икән. Бу хәт америка хәлқара малийә тәрәққият оргининиң мувәққәт иҗраийә директори дев җагадерсанға йезилған болуп, униңға марку рубио, сам тиллис, рик скот, марша бләкборин, бен сасе, җәрий моран қатарлиқлар имза қойған.

Хәттә, байден һөкүмитиниң хитайниң уйғурларға тутқун муамилисини "ирқий қирғинчилиқ", "инсанлиққа қарши җинайәт" дәп бекиткәнлики әскәртилип, мәзкур орган қуяш енергийә техникиси ширкәтлирини мәбләғ билән тәминләштә баҗ тапшурғучиларниң пулиниң ш у а р яки хитайниң һәрқандақ җайидики кримний метали яки көп кристаллиқ кримнейни өз ‍ичигә алған мәҗбурий әмгәк мәһсулатлириға четилип қалмаслиқиға қандақ капаләтлик қиливатқанлиқи, буниңға қарита қандақ тәдбирләрни еливатқанлиқиға чүшүнчә бериши тәләп қилинған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт