Shiwétsiyening érikson shirkiti Uyghur mejburiy emgikige chétishliq, dep eyiblen'gen

Muxbirimiz erkin
2021-11-09
Share

Yéngi ashkarilan'ghan deliller shiwétsiye tor we téléfon shirkiti-ériksonning Uyghurlarni mejburiy emgekke sélish bilen eyibliniwatqan bir xitay shirkiti bilen soda-alaqisi barliqini körsitip bergen. Shiwétsiyediki "Gotténburg tidnin'gén" namliq gézitning bildürüshiche, mezkur gézit ériksonning Uyghurlarni mejburiy qul emgikige séliwatqan wuxendiki bir xitay shirkiti bilen bolghan soda alaqisige a'it höjjetlerni ashkarilighan.

Xewerde, bu xitay shirkitining ismi tilghan élinmighan bolsimu, biraq awstraliye istratégiyelik siyaset instituti 2020-yili élan qilghan doklatida buning 105 neper Uyghurni mejburiy emgekke séliwatqan shirketning del özi ikenlikini tekitligen. Awstraliye tetqiqat orni öz doklatida, 2018-yili 5-ayda kériyedin 105 neper Uyghurning wuxendiki "Yixong inchikilep ishlepchiqirish cheklik shirkiti" ge mejburiy yötkep kélin'genlikini bildürgen. Bu doklat oxshashla H&Mnamliq shiwétsiye shirkitiningmu bu karxana bilen soda alaqisi barliqini ashkarilighan. Biraq H&Mbu shirket bilen alaqisini üzgenlikini jakarlighanidi.

Xewerde qeyt qilinishiche, bu karxanidiki Uyghurlargha ma'ash bérilsimu, biraq ularning bashqa jehettiki shara'iti qullardin perqlenmeydiken. Xewerde ularning chong zalda uxlaydighanliqi, sirtqa chiqishigha ruxset qilinmaydighanliqi, ularning izchil nazaret astida tutulup, jismaniy jazagha uchraydighanliqi, shundaqla ulargha kechte "Idé'ologiyelik terbiyesi" élip bérilidighanliqi tekitlen'gen. Xewerde éytilishiche, érikson shirkiti "Gotténburg tidnin'gén" gha ewetken yazma inkasida, bu shirket bilen hazir alaqisi barliqini ret qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet