Канада һөкүмити хитайниң бир қисим маллирини мәҗбурий әмгәк сәвәбидин мусадирә қилди

Мухбиримиз әзиз
2021-11-17
Share

Йеқинда канада таможниси хитайдин импорт қилинған бир түркүм малларни "мәҗбурий әмгәк билән бағлинишлиқ" дегән әйиб сәвәбидин мусадирә қилди. Бу канада һөкүмитиниң бу саһәдики тунҗи қетимлиқ қаттиқ тәдбир елиши һесаблинидикән.

"йәршари вә почта" гезитиниң 15-ноябирдики хәвиридә ейтилишичә, хитай һөкүмитиниң уйғур дияридики мәҗбурий әмгәк қилмиши 2021-йилиниң бешидин тартип канада чегра мудапиә саһәсигә мәлум болған болсиму, һазирғичә хитайдин импорт қилинған һечқандақ тавар мусадирә қилинмиған икән. Канада чегра мудапиә идарисиниң баянатчиси ребәккә пурдий бу һәқтә мухбирларниң соаллириға җаваб берип, бу қетим мусадирә қилинған таварларниң аяллар вә балилар кийимлири икәнликини, уларниң "пүтүнләй яки қисмән һалда мәҗбурий әмгәк арқилиқ ишләнгән таварлар икәнликини" билдүргән.

Хәвәрдә ейтилишичә, нөвәттә хитайдики мәҗбурий әмгәкниң асаслиқ қурбанлири уйғурлар болуп, уйғур дияридики пахта мәһсулатлири буниңда муһим рол ойнимақта икән. Йәнә уйғур дияридин чиқидиған пәмидур мәһсулатлириму мәҗбурий әмгәккә еғир дәриҗидә четишлиқ икән.

Канада һөкүмитиниң бу қетимқи мәҗбурий әмгәккә четишлиқ мәһсулатларни мусадирә қилиши һәрқайси һөкүмәт әзалирини көп хурсән қилған. Улар буни қизғин алқишлаш билән биргә канада һөкүмитини бу җәһәттә техиму қаттиқ вә әмәлий болған чариләрни ишқа селишқа дәвәт қилған. Нөвәттики әркинлик партийәсиниң әзалиридин сәмир зубәйри бу һәқтә сөз қилип ; "канада һөкүмити бу хилдики мәҗбурий әмгәк мәһсулатлириниң канада базириға киришигә һечқандақ йочуқ қалдурмаслиқи лазим" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт