Aqsu toqumichiliq sahesi 15 milyard somluq mal toxtami tüzgen

Muxbirimiz eziz
2021-11-19
Share

"Aqsu géziti" ning 18-noyabirdiki xewiride éytilishiche, aqsu toqumichiliq sana'iti shehiri (tereqqiyat rayoni) yéqinda sodiger chaqirish murasimi ötküzgen hemde xitay ölkiliridiki jéjyang ölkisi, gu'angju we shangxey sheherliridiki toqumichiliq sahesi bilen üch chong toxtam imzalighan. Bu toxtamlarning omumiy qimmiti 15 milyard som (texminen 2. 35 Milyard amérika dolliri) qimmitide bolup asasliqi kiyim-kécheklerge lazimliq rext toqumichiliqi we üsküne yasash sahesige chétilidiken.

Xewerde éytilishiche, bu aqsu wilayitining tarixidiki bekmu zor sommiliq bir qétimliq mal toxtami imzalash bolup, wilayet rehberliri toluq qatnashqan. Xewerde buning aqsu wilayitining toqumichiliq sahesini güllendürüshte zor ehmiyetke ige ikenliki alahide tekitlen'gen.

Halbuki ötken birnechche yilda Uyghur diyaridiki irqiy qirghinchiliqning bir muhim mezmuni süpitide mejburiy emgekning bekmu keng derijide omumlishiwatqanliqi, xitayning asasliq paxta bazisi bolghan Uyghur diyarida Uyghur déhqanliri "Oshuqche emgek küchini ishqa orunlashturush" dégen namda herqaysi jaylardin yötkilip toqumichiliq we kiyim-kéchek zawutlirida mejburiy emgekke séliniwatqanliqi köplep melum bolghanidi. Bu ghayet zor sommiliq toqumichiliq toxtami nöwette bu xildiki zor kölemlik emgekke da'ir bezi ré'alliqni pash qilghan, dep qariliwatqanliqi melum. Washin'gton shehiridiki "Kommunizm qurbanliri xatire fondi" ning tetqiqatchisi doktur adryan zénz bu heqtiki ra'iyo ziyaritimiz jeryanida "Xitay hökümiti hazir Uyghur rayonini eng chong paxta bazisi we toqumichiliq bazisigha aylandurushqa küch serp qiliwatidu. Chünki bu jayda buninggha kéreklik xam eshya we emgek küchi yéterlik derijide mewjut" dégenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet