Явропа билән хитайниң содиси мәҗбурий әмгәк түпәйлидин тиркишип қалди

Мухбиримиз әзиз
2020-12-22
Share

Йеқиндин буян көпләп мәлум болушқа башлиған уйғур дияридики мәҗбурий әмгәк мәсилиси хитай билән явропа оттурисидики сода вә мәбләғ мунасивәтлиригә еғир хирисларни пәйда қилишқа башлиди. Нөвәттә явропа әллири бу түпәйлидин өзлириниң хитай билән болған сода мунасивитини қайтидин ойлишип көрүшкә тәрәддут қиливатқанлиқи мәлум.

"җәнубий хитай сәһәр гезити" ниң 22-декабирдики хәвиридә ейтилишичә, хитай һөкүмити изчил уйғур дияридики мәҗбурий әмгәкни һәмдә хәлқара әмгәк тәшкилатиниң мәҗбурий әмгәк һәққидики бәлгилимисини инкар қилип келиватқанлиқи үчүн явропа дөләтлири нөвәттә хитай билән болидиған иқтисадий мунасивәттә бәкла тәңқислиқта қалмақта икән. Болупму өткән һәптә явропа парламенти хитай һөкүмитиниң ‍уйғур дияридики мәҗбурий әмгәк қилмишини әйибләш һәққидә қарар алғандин кейин бу хаһиш техиму күчәйгән. явропа парламентиниң әзаси рафайил глуксман бу һәқтә сөз қилип "йиғивелиш лагери вә заманиви қуллуқ мәсилиси көплигән тәшкилатлар ортақ қарши туридиған темилар" дегән.

Явропа дөләтлириниң хитай билән болидиған өзара мәбләғ селиш түрлириму бу түпәйлидин кәскин тәнқидләргә дуч кәлгән. Хитай билән болидиған сода алақисини күчәйтиш һәққидә әң актип болуватқан германийә рәһбири анҗела меркер йеқинда германийә йешиллар партийәсидин маргарет баусниң "сиз мушундақ реаллиқни көрүп турупму йәнила хитай билән сода қилишни тәшәббус қилмақчиму?" дәп соал қоюшиға дуч кәлгән.

Мәлум болушичә, хитайға охшаш коммунизм түзүмидики вийетнам хели бурундин тартип хәлқара әмгәк тәшкилатиниң мунасивәтлик бәлгилимилирини толуқ иҗра қиливатқан болуп, мәҗбурий әмгәк вә балилар әмгикигә хатимә бәргән. Нөвәттә явропа дөләтлири хитайниңму мушундақ бир һалға йетишини җиддий тәләп қилмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт