Awstraliye zakaz qilghan poyizlarning Uyghur mejburiy emgikige chétishliq bolushi mumkinliki ilgiri sürülmekte

Muxbirimiz irade
2020-10-08
Share

Awstraliyening mélborn we sidniy sheherliri üchün xitaydin zakaz qilin'ghan poyizlarning Uyghur mejburiy emgikige chétishliq bolushi mumkinliki ashkarilan'ghan. Awstraliye qatnash ministiri andréw konstans bu xewerdin qattiq chöchügenlikini, bu heqte jiddiy tekshürüsh bashlighanliqini éytqan.

Awstraliyede chiqidighan "Sidniy etigenlik géziti" we "Dewr" qatarliq gézitler sidnéy we mélburn sheherlirining yéngi poyizlirini yasash türi höddige bérilgen xitay tömür yol paychéki hessidarliq shirkiti (CRRC) ning Uyghurlarni mejburiy emgekke sélishtin payda éliwatqan we bu seweblik amérika hökümiti teripidin qara tizimlikke élin'ghan shirket ikenlikini ashkarilighan iken.

Awstraliye qatnash ministiri andréw konstans buning qobul qilishqa bolmaydighan bir ehwalliqini éytip: "Men bu heqtiki xewerni körüp bekla chöchüp kettim. Men awstraliye xelqige bu mesilini jiddiy tekshürüp, estayidil mu'amile qilidighanliqimiz heqqide toluq kapalet bérimen," dégen.

Konstans ependi eger hökümet tekshürüshide heqiqeten bu xitay shirkitining Uyghur qatarliq az sanliq milletlerni ékispilattatsiye qilish bedilige payda éliwatqan bir shirketliki éniqlinip chiqqan teqdirde qandaq tedbir qollinidighanliqi heqqide éniq toxtalmighan. Emma u: "Héchqandaq bir hökümet mejburiy emgek asasidiki mehsulatni sétiwalmasliqi kérek, biz shu chaghda ehwalgha qarita muwapiq tedbir qollinimiz", dégen.

Awstraliye bash ministiri gladis béréjikliyanmu 7-öktebir künidiki bayanatida özining bu mesilige diqqet qiliwatqanliqini we zörür tépilghanda hökümetning zörür tedbir qollinidighanliqini éytqan.

Melum bolushiche, sidnéyning poyizlirini yasash we asrash üchün nechche milyard dollarliq toxtam tüzülgen bolup, ularning beziliri bu yilning béshida awstraliyeg yétip kelgen iken. Xitay shirkiti bilen toxtamlashqan downir namliq shirketning bayanatchisi bmuxbirlargha: "Biz bu heqte tekshürüsh élip barghan xitay tömür yol pay chek hessidarliq shirkiti (CRRC) Uyghurlarni mejburiy emgekke salidighanliqini ret qildi," dégen.

Biraq awstraliyening bu ikki shehiridiki hökümet qurulushini üstige alghan shirket rehberliri we sheherlik hökümet emeldarlirining xitay bilen bolghan munasiwiti yuqiriqi poyiz weqesi bilen otturigha chiqip küchlük munazire qozghimaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.