Америка хитайда ишләпчиқирилған татлиқлаштурғучиларни мәҗбурий әмгәккә четишлиқ, дәп чәклиди

Мухбиримиз ирадә
2020-10-22
Share

Америка чегра даирилири 20-өктәбир сәйшәнбә күни ички моңғулда ишләпчиқирилған стевя маркилиқ татлиқлаштурғучиларни мәҗбурий әмгәккә четишлиқ болғанлиқи үчүн тутуп қалған.

«Җәнубий хитай сәһәр почтиси» гезитиниң хәвиридин қариғанда, америка таможна вә чегра қоғдаш идариси ички моңғулийәгә җайлашқан хеңҗең гуруһи бавҗәнҗав деһқанчилиқ-санаәт вә сода ширкитиниң мәҗбурий әмгәктин пайдилинип туруп, шекәр орниға ишлитилидиған даңлиқ маркилиқ татлиқлаштурғучи ишләпчиқарғанлиқи һәққидә өзлириниң толуқ пакитқа игә икәнликини, шуңа бу мәһсулатларни тутуп қелиш вә мусадирә қилиш һәққидә һәрқайси портларға тәлимат берилгәнликини ейтқан. Мәлум болушичә, ички моңғулдики бу ширкәт пүтүнләй хитайниң дөләт игиликидики бир ширкити икән.

Стевя татлиқлаштурғучиси кокакола қатарлиқ ичимликләрни өз ичигә алған бир қатар даңлиқ мәһсулатларда кәң ишлитилидиған мәһсулат болуп, базар анализ ширкити «QYResearch» ниң санлиқ мәлуматлириға қариғанда, хитай дунядики әң чоң стевя мәһсулатлирини ишләпчиқарғучи дөләт икән.

Америка таможна вә чегра қоғдаш идариси сода ишханисиниң иҗраийә ярдәмчи комиссари бренда симис гезиткә қилған сөзидә, америкадики һәрқайси импорт қилғучи ширкәтләрниң бу вәқә билән һошярлиқини техиму өстүрүп мал тәминләш зәнҗирлирини техиму яхши тәкшүрүп көрүшини вә уларниң чоқум америка һөкүмитиниң инсанийлиқ вә әхлақий өлчәмлиригә лайиқ болушиға капаләтлик қилишини үмид қилидиғанлиқини ейтқан.

Мәлум болушичә, хитай әң чоң тәминлигүчиси болған вә хам материяли уйғур елидә ишләпчқирилидиған қуяш енергийә тахтилириму нөвәттә америка ширкәтлирини җиддийләштүрүватқан бир мәсилигә айланған. Йәршаридики қуяш енергийә мәһсулатлириниң 80 пирсәнтини хитай ишләпчиқиридиған болғачқа, америка ширкәтлири уни хитай завутлиридин тәминләп кәлгәникән. Бирақ америка һөкүмитиниң мәҗбурий әмгәкни чәкләш тәдбирлири нәтиҗисидә хитайдики тәминләш зәнҗирлири давамлиқ һәмкарлишиш ишәнчсиз болуп қалған.

Америка һөкүмити уйғурларниң мәҗбурий әмгики асасида ишләпчиқирилған мәһсутлатларниң америка базириға киришини чәкләш арқилиқ хитай һөкүмитиниң уйғурларни қул әмгикигә селишини тосушқа тиришмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.