Д у қ қатарлиқ тәшкилатлар явропа парламентини мәҗбурий әмгәк мәһсулатлирини чәкләш низамини мақуллашқа чақирған

Вашингтондин мухбиримиз әркин тәйярлиди
2024.04.19

Дуня уйғур қурултийини өз ичигә алған дунядики нурғун аммиви тәшкилатлар, мәнпәәт гуруһлири, санаәт вә сода уюшмилири 18-апрел ортақ чақириқ елан қилип, явропа парламентини мәҗбурий әмгәк мәһсулатлириниң явропа базириға киришини чәкләш низамини бирдәк мақуллашқа чақирған.

76 Тәшкилат, уюшма вә мәнпәәт гуруһи имза қойған ортақ чақириқта, явропа парламенти әзалириниң келәр қетимлиқ йиғинида тәрәпләр бу йил 3-айда ортақ келишим һасил қилған мәзкур низамни қоллап аваз беришини тәләп қилған. явропа иттипақидики дөләтләр 3-айниң башлирида мәзкур низам һәққидә ортақ келишим һасил қилған, шундақла бу низам  3-айниң 20-күни явропа парламентиниң хәлқара сода, ички базар вә истемалчиларни қоғдаш комитетида мутләқ көп аваз билән мақуллинип, явропа парламенти омуми йиғининиң мақуллишиға сунулған иди.

Явропа иттипақиниң мәҗбурий әмгәк мәһсулатлирини чәкләш низамида, уйғур мәҗбурий әмгики алаһидә тилға елинмиған болсиму, шундақла бу низам американиң “уйғур мәҗбурий әмгикиниң алдини елиш қануни” дәк күчлүк қаратмилиққа игә дәп қаралмисиму, бирақ бу низам йәнила уйғур мәҗбурий әмгәк мәһсулатлирини чәкләштә бәлгилик рол ойнайдиғанлиқи илгири сүрүлмәктә.

Мәзкур низам, бу йилниң дәсләпки икки ейида уйғур дияриниң явропа иттипақидики дөләтләргә чиқарған експорти өткән йилниң охшаш мәзгилидин 200 пирсәнттин артуқ көпәйгән бир вақитта, явропа парламентиниң мақуллишиға сунулған. Чақириқта, “биз явропа парламентиниң барлиқ әзалириниң бу қанун әтрапида иттипақлишип, парламентиниң апрел ейи ичидә өткүзүлидиған йиғинида қоллап аваз беришини, униң иҗра қилинишиниң йолини ечишини чақиримиз” дейилгән. Чақириқта қәйт қилинишичә, бу низам мақуллинип йолға қоюлса, явропа иттипақиниң мәҗбурий әмгәккә қарши туруш иқтидарини зор дәриҗидә күчәйтидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.