Қәшқәрдә 37 нәпәр кадир “мәҗбурийитини ада қилмиған” дегән қалпақ билән җавабкарлиққа тартилған

Мухбиримиз қутлан
2016.11.26


Игилинишичә, қәшқәр вилайәтлик интизам тәкшүрүш комитети йеқинда вилайәт тәвәсидики 11 наһийә вә шәһәрдин 37 нәпәр кадирни җавабкарлиққа тартқан.

Хәлқ ториниң бу һәқтики хәвиригә қариғанда, қәшқәр вилайити бойичә наһийә дәриҗилик кадирдин 15 нәпири, бөлүм дәриҗилик кадирдин 22 нәпири “хизмәт мәҗбурийитини ада қилмиған” дегән қалпақ билән омумий уқтуруш қилинған.

Хәвәрдә дейилишичә, уларниң бәзилиригә вәзиписидин қалдуруруш җазаси берилгән болса, бәзилиригә партийә ичидә қаттиқ агаһландуруш җазаси берилгән. Шуниң билән бир вақитта қәшқәр вилайәтлик партком вилайәт тәвәсидики 11 наһийә вә шәһәрдики партийә-һөкүмәт рәһбәрлириниң өзини қаттиқ тәкшүрүшини буйриған.

Бу йеқиндин буян қәшқәр вилайитидики асасий қатлам кадирлириниң тунҗи қетим кәң көләмдә җавабкарлиққа тартилиши вә коллектип җазалиниши һесаблинидикән.

Хәвәрдә көрситилишичә, қәшқәр вилайитидин җавабкарлиқи сүрүштүрүлгән 37 нәпәр кадир “13-бәш йиллиқ” пилан мәзгилидә қәшқәрниң һәрқайси наһийәлиридә қурулмақчи болған қош тил йәслиси қурулушиға актип позитсийә билдүрмигән кадирлар икән.

Мәлум болушичә, 20-өктәбир күни қәшқәр вилайити бойичә қош тил йәслиси қурулушлирини назарәт қилип тәкшүрүшгәндә вилайәт бойичә қурулмақчи болған қош тил йәслилириниң пәқәт бәши өлчәмгә йәткән, 28 йәсли пүтмигән, 70 йәсли техичә қурулуш қиливатқан, 52 йәсли техи иш башлимиған икән. Нәтиҗидә бу хизмәткә мәсул 37 нәпәр кадир қаттиқ бир тәрәп қилинған икән.

Көзәткүчиләр, хитай һөкүмитиниң йеқинқи йиллардин буян уйғур елидики бир қисим асасий қатлам йәрлик кадирлирини “сиясий мәйдани мустәһкәм болмиған” яки “хизмәт мәҗбурийитини ада қилмиған” дегәндәк қалпақлар билән тазилаш обейкти қиливатқанлиқини илгири сүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.