Méng jyenju: térrorluq, tor bixeterliki we ijtima'iy weqeler junggogha tehdit élip kélidu
2016.01.26
Xitay siyasiy qanun komitéti bashliqi méng jyenju, 23-yanwar échilghan memliketlik siyasiy qanun xizmet yighinida, térrorluq weqelirining aldini élish, tor bixeterlikini ching tutush, pul- mu'amile amanliqi we ijtima'iy weqelerning aldini élish qatarliqlarni tekitlep, yuqiriqidek ehwallarning pütkül xitay dölitige tehdit élip kélidighanliqini agahlandurghan.
Xitayning “Junggo awazi” radi'osining 23-yanwardiki xewiridin melum bolushiche, méng jyenju 2016-yili 1-yanwardin bashlap xitayda yolgha qoyulghan “Térrorluqqa zerbe bérish qanuni” ning qattiq ijra qilinidighanliqini tekitlep, “Dölitimiz nöwette térrorluq tehditige uchrawatidu” dégen. U yene xitayning dölet bixeterlikige tehdit élip kélidighan yene bir amilning “Xitay merkizi hökümitige qarshi intérnét uchurliri” ikenlikini, yüz bériwatqan nurghunlighan ijtima'iy naraziliq weqelirige tordiki uchurlar seweb boluwatqanliqini bildürüp intérnét uchur bixeterlikini tekitligen.
Xelq'ara taratqularda bériliwatqan xewerlerde bolsa, xitay hökümitining yillardin buyan “Térrorluqqa zerbe bérish” namida rayonda yüz bériwatqan naraziliq heriketlirini basturuwatqanliqi, “Intérnét bixeterliki” namida, xelq'ara taratqularning xewerlirini cheklesh we xitaydiki chet'el muxbirlirining xitay weziyiti heqqidiki xewerlirini kontrol qilish, xitaydiki kishilik hoquq pa'aliyetchiliri, adwokatlar we erkin yazarlarni tutqun qilish qatarliq wasitilerdin paydilinip, xitay puqralirining uchurdin paydilinish we erkin pikir qilish qatarliq kishilik hoquq erkinlikini boghuwatqanliqi otturigha qoyulmaqta.