Uyghur rayonidiki aliy mekteplerde marksizmni yashlarning "Méngisi we qelbi" ge orunlashturush herikiti bashlan'ghan

Muxbirimiz erkin
2018-05-04
Élxet
Pikir
Share
Print

Uyghur aptonom rayonidiki aliy mekteplerde marksizmni yashlarning "Méngisi we qelbi" ge chongqur orunlashturush teshwiqat herikiti bashlan'ghan.

Xitay axbarat wasitilirining xewer qilishiche, nöwette bu heriket qeshqer uniwérsitétida bashlinip bolghan. Xewerlerde, bu heriketning marks tughulghanliqining 200 yilliqi, "Kompartiye xitabnamisi" élan qilin'ghanliqining 170 yilliqini xatirilesh namida élip bériliwatqanliqi bildürülgen.


"Shinjang géziti" ning xewiride bayan qilinishiche, qeshqer uniwérsitétidiki bu heriketning meqsiti jenubiy Uyghur rayonida "Marksizmning idé'ologiye bazisini berpa qilip, uni yashlarning méngisi we qelbige quyush" iken.

Qeshqer uniwérsitéti marksizm institutining mudiri sün yöxong "Shinjang géziti" ge qilghan mezkur heriket heqqidiki sözide, "Shunga, biz yüreklik bilen bezi oqutush métodlirini yarattuq" dégen. Emma u "Bu yüreklik oqutush métodliri" ning qandaq métod ikenlikini tepsiliy chüshendürmigen.

Közetküchilerning ilgiri sürüshiche, bu heriketning da'iriler Uyghur kompartiye ezalirining roza tutushi, namaz oqushi, hej qilishi, nikah oqushi, méyit namizi chüshürüshi, hala qa'idisi we bashqa herqandaq diniy ehkamlargha emel qilishini cheklep, Uyghurlarni özlirining en'eniwi medeniyiti bilen bolghan alaqisini pütünley üzüshke qistawatqan mezgilde bashlinishi diqqet qozghaydiken.

Ular xitayning marksizmni Uyghurlar bilen xitaylar otturisidiki til, din, medeniyet we örp-adet perqini yoqitip, Uyghurlarni assimilyatsiye qilish üchün qolliniwatqanliqini ilgiri sürüp keldi.

Xitay dölet re'isi shi jinping jüme küni xitayning marksizm nezeriyeside ching turushi "Pütünley toghra" ikenlikini bildürgen. U bu sözlerni marks tughulghanliqining 200 yilliqi munasiwiti bilen xelq sariyida ötküzülgen bir yighinda tekitligen bolup, u, partiye ezaliri marksning nezeriyesini bir xil "Turmush yoli we meniwi qibliname, dep qarishi kérek" dégen.

Toluq bet