Шавкәт мирзийойеф мәркизи асия әллири рәһбәрлириниң бирләшмисини қурушни тәшәббус қилди

Мухбиримиз үмидвар
2017-11-12
Share

Өзбекистан президенти шавкәт мирзийойеф мәркизи асия районидики әлләрниң дөләт рәһбәрлири бирләшмиси қурушни тәшәббус қилған.

Оттура асия хәвәрлири ториниң өзбекистан мәтбуатлиридин нәқил елишичә, шавкәт мирзийойеф сәмәрқәнттә өткүзүлгән "мәркизи асия: охшаш өтмүш, ортақ келәчәк, өзара гүллиниш вә пухта тәрәққият үчүн һәмкарлиқ" дәп аталған хәлқаралиқ йиғинда сөз қилип, өзиниң мәркизи асия әллири рәһбәрлири бирләшмисини қуруш тәшәббусини оттуриға қойған.

У сөзидә мәзкур механизмниң мәркизи асия әллириниң санаәт, мәбләғ, илим җәһәтләрдин һәмкарлишишини әмәлгә ашуридиғанлиқи вә пүтүн мәркизи асия райониниң тәрәққиятини капаләткә игә қилидиғанлиқини илгири сүргән.

Сәмәрқәнттики бу йиғинға мәркизи асия дөләтлири ташқи ишлар министирлири, б д т, явропа иттипақи, мустәқил дөләтләр һәмдостлуқи, шаңхәй һәмкарлиқ тәшкилати қатарлиқ хәлқаралиқ тәшкилатларниң вәкиллири қатнашқан.

Учурлардин мәлумки, илгири қазақистан президенти нурсултан назарбайеф мәркизи асия дөләтлири иттипақи намлиқ бир гәвдә қуруп, ортақ пул чиқириш вә ортақ сода-иқтисадий система бәрпа қилишни тәвсийә қилған болсиму, әмма сабиқ өзбекистан президенти ислам кәримофниң қоллишиға еришәлмигән иди. 

Йеңи өзбек президенти мирзийойеф қазақистан, қирғизистан, түркмәнистан вә түркийә қатарлиқ түркий дөләтләрни зиярәт қилип, уларниң рәһбәрлири билән болған учришишларда даим қериндашлиқ, ортақ тарих вә ортақ мәдәнийәт туғқанчилиқини көп тәкитлигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт