Xitay qaraqash nahiyesidiki pütün meschitlerge yüz tonush apparati ornatqan

Muxbirimiz erkin
2018-07-17
Élxet
Pikir
Share
Print

Uyghur élining qaraqash nahiyesidiki pütün meschitlerge yüz tonush apparati ornitidighanliqi we bu qurulushning xeykang(Hicvision) téxnologiye shirkitige höddige bérilgenliki ashkarilandi.

Xeykang téxnologiye shirkiti izchil xitay hökümitining Uyghur rayonida digital bixeterlik sistémisi qurushigha yardemliship, zor paydigha ériship keldi. Uning bu herikiti kishilik hoquq teshkilatlirining qattiq tenqidige uchrap kelgen idi.

Amérikidiki IPVM namliq bixeterlik téxnikisini nazaret qilish ornining éniqlishiche, qaraqash nahiyesi bu nahiyediki 967 meschit we diniy sorun'gha yüz tonush apparati orunlashturush pilanlap, bu qurulushni xeykang téxnologiye shirkitige höddige bergen. Xitay hökümiti burun Uyghur rayonidiki meschitlerge omumyüzlük közitish apparati orunlashturghan bolsimu, lékin bu qétim qoshumche yüz tonush apparati orunlashturushni qarar qilghan.

Xeykang shirkiti 2017‏-yili qaraqash nahiyesi bilen46 milyon dollarliq bixeterlik qurulush toxtami imzalighan. Mezkur shirket 2016‏-yili xitayning daxu'a namliq yene bir téxnologiye shirkiti bilen birge Uyghur aptonom rayonining bir milyard 200 milyon dollarliq bixeterlik qurulush toxtamigha érishken.

Firansiye agéntliqi ilgiri xeykang shirkitining qaraqash nahiyesidiki yighiwélish lagérlirining digital bixeterlik sistémisini ornitishqa qatnashqanliqini bildürgen idi. IPVM Ning delillishiche, 967 dane yüz tonush apparati qaraqash nahiyesidiki her bir meschitning kirish éghizigha orunlashturulidiken.

Xewerde yene, buninggha qoshumche her qaysi meschitlerge yene 180 gradusluq 840 dane renglik kaméra orunlashturidighanliqi, bu qurulushningmu xeykang shirkitige höddige bérilgenlikini bildürgen.

Xewerde ashkarilishiche, hazirning özide qaraqashtiki 967 meschitning her birige 5 kaméra orunlashturghan bolup, jem'iy 4338 kaméra orunlashturulghan'iken. Uyghur kishilik hoquq teshkilatliri xeykang shirkitining xitay hökümitige yardemliship, uning Uyghur rayonida sadir qiliwatqan "Medeniyet qirghinchiliqi" we "Insanliqqa qarshi turush jinayiti" ge ishtirak qiliwatqanliqini ilgiri sürüp keldi.

Toluq bet