«Арсенал» путбулчиси мәсут өзил хитайниң бесими билән өзиниң икки муһим мусабиқидә орун алмайдиғанлиқини җакарлиған

Мухбиримиз ирадә
2020-10-22
Елхәт
Пикир
Share
Принт

«Арсенал» кулубиниң даңлиқ путболчиси мәсут өзил «арсенал» кулубиниң хитайдики мәнпәәтлирини көзләп туруп, өзини «чолпанлар бирләшмиси» вә «явропа бирләшмә» мусабиқисда ойнашқа таллимиғанлиқини илгири сүргән.

У бу һәптиниң бешида иҗтимаий таратқулар арқилиқ өзиниң путбол мәстанилиригә язған бир парчә хети арқилиқ юқиридики икки мусабиқидә командиға елинмиғанлиқини вә арсенал кулубиниң бундақ қарар елишиға хитай билән болған мәнпәәт тиҗарити сәвәб болди, дәп қарайдиғанлиқини җакарлиған.

Германийәлик түрк потболчи мәсут өзил 2019-йили декабирда өзиниң тиветтер, фейсбук, инстиграм қатарлиқ таратқулар арқилиқ уйғурларға зулум қиливатқан хитай һөкүмитини вә зулумға сүкүт қилған мусулман дунясини қаттиқ әйиблигән иди. Мәсут өзил бу баянати билән хәлқарада зор ғулғула пәйда қилған иди. Әйни чағда америка ташқи ишлар министири майк помпейо мәсут өзилниң мәрданилиқини тәбриклигән. Бирақ арсенал кулуби дәрһал баянат елан қилип, мәсут өзилниң көз қаришиниң пәқәт өзигила вәкиллик қилидиғанлиқини, арсенал путбол кулубиниң сиясәткә арилашмайдиғанлиқини ейтип өзини чәткә алған. Хитай һөкүмити болса вәқәдин қаттиқ нарази болуп, манчестер вә арсенал кулуби оттурисидики мусабиқини хитай мәркизи теливзийә қанилида тарқитишни бикар қилған.

Мәсут өз ил алдинқи күни елан қилған язмисида өзи садиқлиқ билән топ ойниған арсенал кулубиниң қараридин қаттиқ үмидсизләнгән болсиму, адаләтни яқилаштин ваз кәчмәйдиғанлиқини тәкитлигән вә: «мән сизгә вәдә берәләймәнки, бу қарар мениң идийәмдә һечнемини өзгәртәлмәйду. Мән күчүмниң йетишичә давамлиқ мәшиқ қилимән, имканқәдәр авазимни қәбиһликкә қарши туруш вә адаләтни яқилаш үчүн ишлитимән» дегән.

Пикирләр (0)
Share
Толуқ бәт