Германийәлик түрк путбол чолпини мәсуд өзил мусулманларни уйғурларниң әһвалиға «көз юмуш» билән әйиблиди

Мухбиримиз әркин
2019-12-13
Елхәт
Пикир
Share
Принт

Германийәлик атақлиқ түрк путбол чолпини, испанийә арсенал командисиниң путболчиси мәсуд өзил 13‏-декабир күни тиветтерда пикир йезип, мусулманларни уйғурларниң ечинишлиқ тәқдиригә көз юмуш билән әйиблиди.

Мәсуд өзилниң тивиттерда 24 милйондин артуқ әгәшкүчиси бар болуп, униң сөзи тивиттерда қаттиқ ғулғула қозғиған. Һазирға қәдәр униң сөзини 17миң адәм һәмбәһирлигән. Мәсуд өзилниң тивети хитай һөкүмити дөләт ичи вә сиртида американиң «уйғур кишилик һоқуқ қанун лайиһәси» гә қарши кәң көләмлик тәшвиқат қозғап, өзиниң уйғур районидики кишилик һоқуқ дәпсәндичиликини рәт қиливатқан мәзгилдә елан қилинған. 

Мәсуд өзил тиветида уйғурларни әрзийәткә қарши тирәҗәватқан «муҗаһид вә муҗаһидәләр топи», «шанлиқ мөминләр» дәп тәриплигән. У мундақ дәп язған: «қуранлар көйдүрүлмәктә. Җамәләр чеқилмақта, мәдрисиләр тақалмақта, диний алимлар бир-бирләп өлтүрүлмәктә, әркәкләр лагерларға қамилип, уларниң аилилиригә хитай әркәкләр орунлаштурулмақта. Аяллар хитай әркәклиригә мәҗбурий өйләндүрүлмәктә. Буниңға қаримай муһәммәт пәйғәмбәрниң үммәтлири сүкүт қилмақта, уларниң зувани тутулмақта. Мусулманлар игә чиқмиди, әҗаба улар зулумға рази болушниң зулум икәнликини билмәмдиғанду?»

Мәсуд өзил йәнә бу мәсилиниң ғәрб дөләтлиридә вә таратқулирида кәң хәвәр қилинип келиватқанлиқини әскәртип мундақ дегән: «мусулман таратқулар вә дөләтләр қәйәрдә? зулум болуватқан йәрдә битәрәп турувелишниң номуссизлиқ болидиғанлиқини улар билмәмдиғанду? йиллардин кейин у йәрдики қериндашлиримизниң бу ечинишлиқ күнләр һәққидә есидә қалидиғини һәргизму залимларниң искәнҗиси әмәс, бәлки мусулман қериндашлириниң сүкүти болидиғанлиқини биләмдиғанду?» 

Хитайниң 3 милйондәк уйғур, қазақ вә башқа милләтләрни лагерларға қамап, районда омумиййүзлүк тәқиб вә мәҗбурий ассимилиятсийә елип бериши америка һөкүмити вә ғәрб таратқулириниң изчил күнтәртипини игиләп кәлгән болсиму, лекин мусулман дунясиниң буниңға көз юмуши, һәтта пакистан, сәуди әрәбистан, мисирдәк бәзи мусулман дөләтлириниң хитайни қоллиши уйғурларни үмидсизләндүргән, кишилик һоқуқ тәшкилатлириниң қаттиқ тәнқидигә учрап кәлгән иди.

Пикирләр (0)
Share
Толуқ бәт