Gérmaniyelik türk putbol cholpini mes'ud özil musulmanlarni Uyghurlarning ehwaligha "Köz yumush" bilen eyiblidi

Muxbirimiz erkin
2019-12-13
Élxet
Pikir
Share
Print

Gérmaniyelik ataqliq türk putbol cholpini, ispaniye arsénal komandisining putbolchisi mes'ud özil 13‏-dékabir küni tiwéttérda pikir yézip, musulmanlarni Uyghurlarning échinishliq teqdirige köz yumush bilen eyiblidi.

Mes'ud özilning tiwittérda 24 milyondin artuq egeshküchisi bar bolup, uning sözi tiwittérda qattiq ghulghula qozghighan. Hazirgha qeder uning sözini 17ming adem hembehirligen. Mes'ud özilning tiwéti xitay hökümiti dölet ichi we sirtida amérikaning "Uyghur kishilik hoquq qanun layihesi" ge qarshi keng kölemlik teshwiqat qozghap, özining Uyghur rayonidiki kishilik hoquq depsendichilikini ret qiliwatqan mezgilde élan qilin'ghan. 

Mes'ud özil tiwétida Uyghurlarni erziyetke qarshi tirejewatqan "Mujahid we mujahideler topi", "Shanliq möminler" dep teripligen. U mundaq dep yazghan: "Qur'anlar köydürülmekte. Jameler chéqilmaqta, medrisiler taqalmaqta, diniy alimlar bir-birlep öltürülmekte, erkekler lagérlargha qamilip, ularning a'ililirige xitay erkekler orunlashturulmaqta. Ayallar xitay erkeklirige mejburiy öylendürülmekte. Buninggha qarimay muhemmet peyghemberning ümmetliri süküt qilmaqta, ularning zuwani tutulmaqta. Musulmanlar ige chiqmidi, ejaba ular zulumgha razi bolushning zulum ikenlikini bilmemdighandu?"

Mes'ud özil yene bu mesilining gherb döletliride we taratqulirida keng xewer qilinip kéliwatqanliqini eskertip mundaq dégen: "Musulman taratqular we döletler qeyerde? zulum boluwatqan yerde biterep turuwélishning nomussizliq bolidighanliqini ular bilmemdighandu? yillardin kéyin u yerdiki qérindashlirimizning bu échinishliq künler heqqide éside qalidighini hergizmu zalimlarning iskenjisi emes, belki musulman qérindashlirining süküti bolidighanliqini bilemdighandu?" 

Xitayning 3 milyondek Uyghur, qazaq we bashqa milletlerni lagérlargha qamap, rayonda omumiyyüzlük teqib we mejburiy assimiliyatsiye élip bérishi amérika hökümiti we gherb taratqulirining izchil küntertipini igilep kelgen bolsimu, lékin musulman dunyasining buninggha köz yumushi, hetta pakistan, se'udi erebistan, misirdek bezi musulman döletlirining xitayni qollishi Uyghurlarni ümidsizlendürgen, kishilik hoquq teshkilatlirining qattiq tenqidige uchrap kelgen idi.

Toluq bet