Arsénalning sabiq diréktori mes'ut özilning Uyghurlar heqqidiki chaqiriqini qollidi

Muxbirimiz erkin
2019-12-18
Share

En'giliye arsénal kulubining sabiq diréktori arsén wen'gér arsénalning gérmabniyelik putbol cholpini mes'ut özilning Uyghurlar heqqidiki pikirini qollaydighanliqini bildürgen.

Firansiye agéntliqining bildürüshiche, arsén wen'gér 18‏-dékabir küni qatar paytexti doxada muxbirlargha söz qilip, "Mes'ut özilning her kishige oxshashla söz qilish erkinliki bar. U özining dangqini ishlitip, öz qarishini bayan qildi. Elwette, hemme ademning uning qarishini qollap kétishi kétishi natayin. Lékin uning öz pikirini bayan qilish hoquqi bar" dégen. Mesut özilning ötken jüme künki féysbuk, twittér, inistigram, xitayning beydu qatarliq ijtima'iy taratqularda birla waqitta élan qilghan Uyghurlar heqqidiki sözi dunyada qattiq ghulghula qozghighan.

Xitay hökümiti uninggha inkas bildürüp, uning "Saxta xewerlerning qaymuqturushi" gha uchrighanliqini ilgiri sürgen. Mesut özil sözide: "Sherqiy türkistanda qur'anning köydürülüp, meschit we medrisilerning chéqiliwatqanliqi, diniy alimlarning öltürülüwatqanliqi, erkeklerning lagérlargha qamilip, ularning a'ililirige xitay erkeklirining orunlashturulghanliqi, Uyghur ayallirining xitay erkeklirige mejburiy öylendürüliwatqanliqi" ni bildürüp, lékin "Ümmetining buninggha süküt qiliwatqanliqi" ni tenqidligen. Arsénal kulubi mes'ut özilning sözige musape qoyup, uning sözining özlirige wekillik qilmaydighanliqini bildürgen bolsimu, lékin xitay hökümet taratquliri uning sözining arsénalgha "Jiddiy tesirliri" ning bolidighanliqini tekitligen.

17‏-Dékabir küni amérika tashqi ishlar ministiri mayk pompéyo xitayning inkasini tenqidlep, kompartiyening öz teshwiqat wasitiliride "Mes'ut özil hem 'arsénal'ning namini 'qara tizimlik' ke kirgüzüp qoyalishi mumkinliki, emma ularning heqiqetni yépishqa ilajsiz" ikenlikini bildürgenidi.

Firansiye agéntliqining bildürüshiche, arsén wen'gér yene mesut özilning sözi arsénalgha emes. Uning özige wekillik qilidighanliqini bildürüp, "Siz özingizning shexsiy pikirini ipadiligende uning aqiwitini qobul qildingiz démekliktur" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet