Xitay hökümitining musulmanlarning diniy étiqadini cheklesh toghrisidiki mexpiy höjjiti ashkarilandi
2018.06.22
Xitay kompartiyesi merkizi komitéti we dölet ishliri kabinétining bu yil 4-ayda mexpiy höjjet chüshürüp, herqaysi ölke, aptonom rayon we biwasite qarashliq sheherlerdiki her derijilik siyasiy, memuriy we herbiy organlarning islam dinini qattiq cheklishini telep qilghanliqi ashkarilandi.
Xitay kompartiyesi merkizi komitéti ishxanisi tarqatqan 2018-24 nomurluq mexpiy höjjitining bir qisim mezmuni 22-iyun küni dunya Uyghur qurultiyi teripidin élan qilindi.
Dunya Uyghur qurultiyining mezkur höjjetke qandaq érishkenliki melum emes. Emma höjjette her derijilik organlarning “Gheyriy junggolishish xahishini tosup, meschitlerning qurulush shekli, kiyim-kéchek, diniy murasim, diniy tebligh, ereb tilini ishlitish qatarliq jehetlerde meydan'gha kelgen se'udilishish we ereblishishni qet'iy cheklesh” telep qilin'ghan.
Höjjette yene alaqidar da'irilerning islam dini sorunlirining qurulushini qattiq nazaret qilip, bu orunlarning xitayche qurulush alahidiliklirini gewdilendürüsh, medeniyet yadikarliqlirini qoghdash orunlirining xitayche qurulush alahidiliklirige ige meschitlerni qattiq qoghdishi telep qilin'ghan.
Xitay kompartiyesi merkizi komitétining mezkur höjjiti xitay hökümiti Uyghur diyaridiki meschitlerning qubbe we munarlirini chéqip tashlawatqan, hej qilghan, namaz oquydighan yaki roza tutidighan musulmanlarni “Yighiwélish lagérliri” gha solap qattiq jazalawatqan bir mezgilde ashkarilandi.
Dunya Uyghur qurultiyining bayanatchisi dilshat rishit 22-iyun teywen merkizi axbarat agéntliqigha bergen bayanatida xitay da'irilirining meschitlerni teqib qiliwatqanliqini, radikal wasitilerni qollinip, diniy kitab, diniy buyumlarni musadire qiliwatqanliqini, nikah we depne murasimlirigha arilishiwatqanliqini shundaqla Uyghurlarni héchqandaq qanuniy resmiyetsiz keng kölemde “Yighiwélish lagérliri” gha solawatqanliqini qattiq tenqid qilghan.