«Ню-йорк вақти» гезити хитайниң әйибләшлиригә җаваб қайтуруп «биз пакитни ашкарилидуқ» деди

Мухбиримиз ирадә
2019-11-19
Елхәт
Пикир
Share
Принт

«Ню-йорк вақти» гезити 16‏-ноябир күни хитайниң уйғурларни кәң көләмлик тутқун қилип, лагерларға қамаш тоғрисидики мәхпий һөҗҗитини ашкарилап зор ғулғула қозғиғандин кейин хитай һөкүмити өзиниң ахбарат васитилирини ишқа селип туруп, мәзкур гезиткә һуҗум қилмақта. Уйғур аптоном районлуқ һөкүмәт болса пакитни пүтүнләй инкар қилип, «ню-йорк вақти» гезитини «ялған хәвәр» тарқитиш билән әйиблигән.

Хитайниң ташқи ишлар баянатчиси гең шваң 18-ноябир күнидики ахбарат елан қилиш йиғинида «ню-йорк вақти» гезити ашкарилиған һөҗҗәтләрни инкар қилалмиған болсиму, бирақ уни «хитайниң шинҗаңдики тиришчанлиқлириға қара сүртүшкә урунди» дәп әйиблигәниди. Бирақ арқидин «шинҗаң уйғур аптоном районлуқ һөкүмәт» бу һәқтики баянат берип: «ню-йорк вақти гезити ашкарилиған учурлар пүтүнләй ички вә ташқи дүшмәнләр тәрипидин ойдуруп чиқилған, яман нийәт йошурунған бир ялғанчилиқ» дегән сөзләр билән әйиблигән.

18-Ноябир күни «ню-йорк вақти» гезитиниң баянатчиси даниял роадес бу әйибләшләргә җаваб қайтуруп төвәндикиләр дегән: «бизниң бу хәвиримиз хитайниң 400 бәттин артуқ ички мәхпий һөҗҗитигә асаслинип туруп тарқитилған. Бу һөҗҗәт бизни хитай һөкүмитиниң шинҗаңдики милләтләргә йүргүзүватқан бастурушлири һәққидә илгири көрүлүп бақмиған дәриҗидики әң ишәнчлик пакитлар билән тәминлиди. Бундақ жорналистлиқ җүмлидин һәқиқәтни издәш вә кишиләрниң бу дуняни чүшинишигә ярдәм қилиш бизниң хизмитимизниң әң негизлик нишанидур».

Хитайниң «хәлқ гезити», «тәңритағ тори», «хитай күндилик гезити» қатарлиқларда бирдәк «ню-йорк вақти» гезитиниң уйғур елигә аит ашкарилиған мәхпий һөҗҗәтлиригә рәддийә берилгән вә уйғур районлуқ һөкүмәтниң инкасиму тарқитилған. Әмма бу һәқтики хәвәрләрниң бу тор бәтләрниң уйғур тили нусхисидин орун алмиғанлиқи диққәт қозғиди.

Пикирләр (0)
Share
Толуқ бәт