"Nyu-york waqti" géziti xitayning eyibleshlirige jawab qayturup "Biz pakitni ashkariliduq" dédi

Muxbirimiz irade
2019-11-19
Élxet
Pikir
Share
Print

"Nyu-york waqti" géziti 16‏-noyabir küni xitayning Uyghurlarni keng kölemlik tutqun qilip, lagérlargha qamash toghrisidiki mexpiy höjjitini ashkarilap zor ghulghula qozghighandin kéyin xitay hökümiti özining axbarat wasitilirini ishqa sélip turup, mezkur gézitke hujum qilmaqta. Uyghur aptonom rayonluq hökümet bolsa pakitni pütünley inkar qilip, "Nyu-york waqti" gézitini "Yalghan xewer" tarqitish bilen eyibligen.

Xitayning tashqi ishlar bayanatchisi géng shwang 18-noyabir künidiki axbarat élan qilish yighinida "Nyu-york waqti" géziti ashkarilighan höjjetlerni inkar qilalmighan bolsimu, biraq uni "Xitayning shinjangdiki tirishchanliqlirigha qara sürtüshke urundi" dep eyibligenidi. Biraq arqidin "Shinjang Uyghur aptonom rayonluq hökümet" bu heqtiki bayanat bérip: "Nyu-york waqti géziti ashkarilighan uchurlar pütünley ichki we tashqi düshmenler teripidin oydurup chiqilghan, yaman niyet yoshurun'ghan bir yalghanchiliq" dégen sözler bilen eyibligen.

18-Noyabir küni "Nyu-york waqti" gézitining bayanatchisi daniyal ro'adés bu eyibleshlerge jawab qayturup töwendikiler dégen: "Bizning bu xewirimiz xitayning 400 bettin artuq ichki mexpiy höjjitige asaslinip turup tarqitilghan. Bu höjjet bizni xitay hökümitining shinjangdiki milletlerge yürgüzüwatqan basturushliri heqqide ilgiri körülüp baqmighan derijidiki eng ishenchlik pakitlar bilen teminlidi. Bundaq zhornalistliq jümlidin heqiqetni izdesh we kishilerning bu dunyani chüshinishige yardem qilish bizning xizmitimizning eng négizlik nishanidur".

Xitayning "Xelq géziti", "Tengritagh tori", "Xitay kündilik géziti" qatarliqlarda birdek "Nyu-york waqti" gézitining Uyghur élige a'it ashkarilighan mexpiy höjjetlirige reddiye bérilgen we Uyghur rayonluq hökümetning inkasimu tarqitilghan. Emma bu heqtiki xewerlerning bu tor betlerning Uyghur tili nusxisidin orun almighanliqi diqqet qozghidi.

Toluq bet