Mishél bachélét Uyghur élidiki ziyariti dawamida hökümet xadimlirining yénidin “Ayrilmighanliqi” ni bildürgen

Muxbirimiz irade
2022.06.16
Share on WhatsApp
Share on WhatsApp

B d t kishilik hoquq aliy komissari mishél bachélét Uyghur élidiki ziyariti mezgilide özining tutqundiki Uyghurlar we yaki ularning a'ile-tawabi'atliri bilen körüshelmigenlikini, chünki xitay hökümet xadimlirining özige dawamliq egiship bille yürgenlikini éytqan.

En'giliyening “Muhapizetchi” gézitining xewer qilishiche, Uyghur élidiki netijisiz ziyariti sewebidin küchlük tenqidlerge uchrighan we yéqinda özining pénsiyege chiqidighanliqini élan qilghan bachélit xanim, hazir jenwede ötküzüliwatqan b d t 50-nöwetlik kishilik hoquq kéngishi mezgilidiki élan qilghan bayanatida özining xitaydiki ziyaritige “Cheklime qoyulghanliqi” ni bildürgen.

U 15-iyun künidiki bayanatida, “Gu'angdungdiki ziyaritide bir qisim puqrawi teshkilatlar wekilliri bilen ayrim körüshüsh pursiti bolghanliqini, emma Uyghur élidiki ziyariti mezgilide hökümet xadimlirining dawamliq özige egishiwalghanliqi” ni ashkarilighan.

U yene mundaq dégen: “Men qeshqerdiki türmini we ‛atalmish kespiy ma'arip we terbiyilesh merkizi‚ ni ziyaret qilip, da'iriler bilen sözleshtim. Emma men ziyaret jeryanida hazir qolgha élin'ghan héchqandaq Uyghur yaki ularning a'ile-tawabi'atliri bilen paranglishalmidim. Men buni burunla perez qilghachqa, ziyaritimdin burun hazir chet ellerde yashawatqan bir qisim sabiq mehbuslar we yéqinliri bilen alaqisi üzülüp qalghan a'ililer bilen körüshken idim.”

Halbuki, mishél bachélét xitayni ziyaret qilish pilanini élan qilghanda nurghunlighan kishilik hoquq organliri uni bu ziyarettin tosqan idi. Chünki uning xitayda milyonlighan Uyghurlar tutup turuluwatqan lagérlar we rayondiki bashqa teqip sistémilirini erkin-azade ziyaret qilishigha yol qoyulmaydighanliqini, eksiche bu “Ziyaret” arqiliq xitaygha öz siyasetlirini aqlash pursiti bérip qoyudighanliqi toghriliq agahlandurghan idi.

Mishel bachélétning xelq'aradiki shunche chaqiriqlargha qulaq salmastin Uyghur rayonigha “Ziyaret” ke bérishi we netijisisz qaytip kélishi, mishél bachélét we b d t kishilik hoquq kéngishining obrazigha qattiq dagh tegküzgen. Shu sewebtin mishél bachélét we u wekillik qilghan b d t kishilik hoquq kéngishi xelq'ara jem'iyetning küchlük eyibleshlirige uchrimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.