Xitay hökümiti shahit méhrigül tursunning amérikida bergen guwahliqigha inkas qayturdi

Muxbirimiz shöhret hoshur
2018-11-28
Élxet
Pikir
Share
Print

Xitayning eng chong hökümet taratquliridin biri bolghan "Yer shari waqti géziti" bügün bir parche tehrirat maqalisi élan qilip, Uyghur diyaridiki lagérdin qutulup chiqqan méhrigül tursunning aldinqi küni amérika döletlik axbarat kulubida bergen guwahliqi üstidin shikayet qildi.

Méhrigül tursun tünügün, yeni 27-noyabir qilghan guwahliq bayanatida özining cherchende 37 kwadrat métirliq bir kamirigha jem'iy 67 ayal tutqun bilen bille solan'ghanliqi, 3 ay ichide kamérdiki tutqunlardin 9 nepirining hayatidin ayrilghanliqini pash qilghan idi.

"Yershari waqti géziti" bügünki tehrirat maqaliside méhrigül tursunning amérikidiki guwahliq sözlirini tilgha élip, uning "Pütünley yalghan bir hékayini toqup chiqqanliqi" ni ilgiri sürgen. Méhrigül guwahliq sözide yene xitayning yighiwélish lagérlirini "Kespiy terbiyelesh merkizi" dep tonushturushini inkar qilip, özi bilen bille solan'ghanlarning köpinchisining oqutquchi, doxtur we bashqa sahediki kesip igiliri ikenlikini, ularning kespiy terbiyege éhtiyaji yoqluqini otturigha qoyghan idi.

"Yer shari waqti géziti" méhrigül tursunning guwahliq sözlirini xewer qilghan gherb axbarat wasitilirini terepbazliq qilish bilen eyibligen. "Yer shari waqti géziti" yene Uyghur diyardiki lagérlarning "Kespiy téxnika terbiyelesh orni" ikenlikini, méhrigülning amérikida bergen guwahliq sözlirining bashqilar teripidin ögitilgenlikini ilgiri sürgen. Mezkur tehrirat maqaliside yene gherbning lagérlar heqqidiki xewerlirini gherb bilen xitay arisidiki idé'ologiyelik hangning barghanséri zoriyip bériwatqanliqining ipadisi dep shikayet qilghan.

Méhrigül tursun tünügünki guwahliq sözide özining xitayda qamaqxanigha solan'ghan mezgilide saqchilar teripidin chet'eldiki melum bir teshkilat bilen alaqisining bar-yoqluqi heqqide izchil soraqqa tartilip, qattiq qéyin-qistaq we qiynaqqa élin'ghanliqinimu pash qilghan idi.

Toluq bet