Yaponiyelik kartonistning méhrigül tursun heqqidiki karton romani zor qiziqishqa érishken

Muxbirimiz erkin
2019-12-16
Élxet
Pikir
Share
Print

Yaponiyelik yazghuchi we kartonist tomomi shimizuning sabiq Uyghur lagér tutquni méhrigül tursun heqqidiki karton romani zor qiziqish qozghighan.

"Washin'gton pochtisi" gézitining xewer qilishiche, karton romani hazirgha qeder 240 ming qétim körülgen, shundaqla twéttir qatarliq ijtima'iy taratqularda 2 milyon 600 ming yaxshi körüshke érishken. Tomoni shizumining "Manga néme boldi: bir Uyghur ayalning guwahliqi" namliq karton romani méhrigül tursunning türme we lagérdiki kechmishige da'ir bayanlirini asas qilip, uning misirgha toy qilip, 3 qosh kézek tughushi, weten'ge qaytip tutqun qilinishi, lagér we türmide ten jazasigha uchurushi, 3 kézek balisining birining ölüp kétishi, shundaqla yoldishining 16 yilliq qamaqqa höküm qilinishi qatarliq tragédiyelik kechmishini téma qilidu. Hazir ikki perzenti bilen amérikida yashawatqan méhrigül tursun xitayning yighiwélish lagérliridin hayat qutulup chiqqan sanaqliq tutqunlarning biri bolup, uning tragédiyelik kechmishi xelq'arada qattiq ghulghula qozghighanidi.

Tomomi shimizuning "Washin'gton pochtisi" gézitige bildürüshiche, u méhrigül tursun bilen biwasite alaqiliship baqmighan bolsimu, emma u mezkur karton romanini yézishta Uyghurlarning basturushqa uchrawatqanliqi we méhrigül tursunning kechmishini anglap shuningdin ilham alghan. Shimizu "Washin'gton pochitisi" ning muxbirigha qilghan sözliride yene "Men néme ish qilip béreleymen?, dep oylidim. . . . . . Men karton sizishni 20 yilning aldida bashlighan. Shuning bilen karton sizay, dégen oygha keldim" dégen. Lékin, tomomi shizumining bildürüshiche, bu uning Uyghurlar heqqide sizghan tunji kartoni emes iken. U, xitayning Uyghurlarni basturuwatqanliqini tunji qétim bir téléwiziye qanilining höjjetlik filimide körgen. Shuning bilen u bu yil 5‏-ayda özining "Héchkim u döletning ismini éytip bérelmeydu" mawzuluq Uyghurlar heqqidiki tunji karton süretlik romanini sizip chiqqan. Uning bildürüshiche, bu karton uning yaponiyediki Uyghurlargha qiziqish qozghighan bolup, u méhrigül tursunning weqesini xelq'ara kechürüm teshkilati bilen yaponiye méyji uniwérsitétining birliship ötküzgen bir pa'aliyitide anglighan iken.

Toluq bet