Mayk pompéyo: "Biz (Uyghur mesiliside) bolupmu musulman döletlirining zuwan sürüshige éhtiyajliq"

Muxbirimiz erkin
2019-09-27
Élxet
Pikir
Share
Print

Amérika tashqi ishlar ministiri mayk pompéyo 26‏-séntebir küni nyu-york shehiride axbarat yighini ötküzüp, Uyghur mesiliside téximu köp döletlerning, bolupmu musulman döletlirining zuwan sürüshi kéreklikini bildürgen.

U axbarat yighinida süriye, iran we Uyghur mesilisini öz ichige alghan nuqtiliq 3 mesile heqqide toxtalghan. Mayk pompéyo Uyghurlar heqqide toxtalghanda b d t ning bu nöwetlik yilliq yighini jeryanida ötküzülgen Uyghurlar heqqidiki yighin'gha 30 nechche döletning ishtirak qilghanliqini bildürüp, biraq bu mesilige téximu köp döletlerning ishtirak qilishi, bolupmu musulman döletlirining ishtirak qilishi kéreklikini tekitligen. 

Amérika tashqi ishlar ministirliqining uchurida qeyt qilinishiche, mayk pompéyo mundaq dégen: "Prézidént tramp b d t da xelq'ara diniy erkinlik yighinigha sahibxaniliq qildi. Biz yighinda shahitlarning yürekni daghlighudek kechmishlirini angliduq. Shundaqla tashqi ishlar ministirliqi en'gliye, gérmaniye, gollandiye, kanada qatarliq döletlerning ortaq sahibxaniliqida xitayning bir milyondin artuq Uyghur musulmanlirini shinjangdiki yighiwélish lagérlirida tutup turuwatqanliq mesilisi téma qilin'ghan pa'aliyet ötküzdi." 

Mayk pompéyoning ilgiri sürüshiche, gerche bu pa'aliyetke 30 nechche dölet qatnashqan bolsimu, lékin bu yéterlik emes iken. U "Biz téximu köp döletlerning, bolupmu musulmanlar köp sanliqni igileydighan döletlerning 21‏-esiridiki bu qorqunchluq kishilik hoquq depsendichilikige qarshi awazini chiqirishigha éhtiyajliq," dégen. 

Pompéyo bu sözlerni xitay tashqi ishlar ministiri wang yi 25‏-séntebir b d t xewpsizlik kéngishide söz qilip, xitayning Uyghur rayonidiki atalmish "Radikalliqni tügitish" tedbirlirini aqlighandin kéyinla qildi. Wang yi xewpsizlik kéngishide Uyghur rayonidiki "Radikalliqni tügitish" tedbirlirini "Xitayning xelq'ara térrorluqqa qarshi turush kürishige qoshqan muhim töhpisi" dep teripligen idi. Kishilik hoquq teshkilatlirining ilgiri sürüshiche, nöwette xitay hökümiti 2 milyondek Uyghurni bu lagérlarda tutup turmaqta iken.

Toluq bet