Хитай даирилири хитай пуқралирини уйғур қошнилириға қарши «мудапиә әслиһәлири» билән қоралландурушқа башлиған

Мухбиримиз әркин
2018-11-26
Елхәт
Пикир
Share
Принт

Уйғур районидики йәрлик даириләр хитай пуқралириниң «мудапиә әслиһәлири» ни сетивелип, қошна өйләрдики мусулман уйғур аилиләргә қарита «иҗтимаий муқимлиқ» ни қоғдишини тәләп қилғанлиқи илгири сүрүлди.

«Зиминстан» намлиқ диний әркинлик ториниң хәвиридә ашкарилинишичә, хитай даирилириниң «он аилилик бирләшмә мудапиә программиси» дәп нам берилгән бу сиясити бу йил 4‏-айдин башлап иҗра қилинишқа башлиған. Мәзкур программида хитай пуқралириниң төмүр қалпақ, қалқан, от өчүрүш әсваби, пәләй, мудапиә пинҗики, сим тор қатарлиқ қоралларни сетивелиши тәләп қилинғанлиқини билдүргән.

«Зимистан» ториниң хәвиридә ашкарилинишичә, «бирләшмә мудапиә программиси» ға қатнашқан хитай пуқралириниң вәзиписи уйғурларниң қияпити вә кийим-кечәклиригә диққәт қилиши, кийим кечикидә ай юлтузниң бәлгиси бар кишиләрни, сақал қойған әркәкләрни, һиҗапланған аялларни вә «башқа гуманлиқ шәхсләр» ни назарәт қилишкән. Хәвәрдә йәнә хитай аилиләрниң өйигә агаһландуруш сигнали вә бихәтәрлик камераси сетивелип орунлаштуруши тәләп қилинғанлиқи илгири сүрүлгән.

«Зимистан» ториниң хәвиридә баян қилинишичә, буниңдин бир қанчә ай аввал қумул шәһиридә бир идариниң байрақ чиқириш мурасимидин кейин, идариниң партком секретари уйғурларни қайтуруветип, хитай хизмәтчиләргә айрим йиғин ачқан. У йиғинда «10 аилилик бирләшмә мудапиә программиси» ни тонуштуруп, бу программа уйғурларниң дөләткә қарши исян көтүрүшиниң алдини елишқа мунасивәтлик икәнликини билдүргән.

Хәвәрдә ашкарилинишичә, нөвәттә бу программа қумул, санҗи, күйтун, шихәнзә, хотән қатарлиқ җайларда иҗра қилмақта икән. Хәвәрдә, хитай пуқралириниң юқириқи әсвабларни өз пулиға сетивелип, дөләтниң аз санлиқ милләтләргә вә динға қарши һәм «әсәбийлик» ни түгитиш үчүн күрәш қилиши тәләп қилиниватқанлиқи билдүрүлгән.

Пикирләр (0)
Share
Толуқ бәт