Jéymis dorséy: “Xitay Uyghur milliy kimlikining ipadilinishige qarshi turuwatidu!”
2018.04.03
Xitay hökümitining yéqindin buyan muhajirettiki Uyghurlarning birlik we ittipaqliq asasida xuddi tibetlerge oxshash küchlük bir muhajirlar topi hasil qilishidin wayim yewatqanliqi melum bolmaqta.
Tetqiqatchi jéymis dorséyning 3-aprél élan qilghan bu heqtiki maqaliside körsitilishiche, xitay hökümiti nöwette ijra qiliwatqan “Bir belwagh bir yol” qurulushining bir halqisi afghanistanni mushu qurulushning terkibi qismigha aylandurush hemde bu jayda özlirining herbiy bazisini tesis qilish, shu arqiliq chet'ellerdiki Uyghurlarni qayturup kélish we Uyghurlar diyaridiki herqandaq kishining “Siyasiy terbiye” ge qatnashmay turup chet'elge chiqishining aldini élish bolmaqta iken.
Buning üchün xitay hökümiti afghanistanning mis kanlirigha üch milyard amérika dolliriliq meblegh salghan hemde Uyghur qoralliqlirining waxan karidori arqiliq xitaygha bérishining aldini alghan.
Aptorning pikirige qarighanda, xitay hökümiti izchil özlirining afghanistanda herbiy baza qurghanliqini inkar qilip kéliwatqan bolsimu, yerlik ahale buning rastliqini köp qétim delilligen idi.
Xitay hökümitimu yéqinda özlirining afghanistan'gha 70 milyon amérika dolliriliq herbiy yardem bergenlikini élan qilghan.