Ma'arip nazariti oqutquchi qobul qilish élanidiki "Millet özgertish sherti" ni tüzitishke mejbur boldi

Muxbirimiz méhriban
2013-05-23
Élxet
Pikir
Share
Print

Uyghur aptonom rayonluq ma'arip nazariti ürümchi waqti 23-may kech sa'et 20 de ma'arip nazaritining mikro blogida tuyuqsizla "Xitay tilida oqughan az sanliq milletler xitaylar qobul qilinidighan kesiplerge iltimas qilsa, milliti dégen katekchige öz millitini toldursa bolidu" dégen uqturushni chiqirip, eslidiki belgilimige tüzitish kirgüzülgenlikini bildürdi.

Uyghur aptonom rayonluq ma'arip nazariti 19-may küni ma'arip nazaritining mikro blogida élan qilghan "2013-Yilliq ottura, bashlan'ghuch mekteplerge oqutquchi qobul qilish imtihani uqturushi" diki belgilimide "Xenzular qobul qilinidighan ish orunlirigha xenzu tilida oqughan yaki ana tili xenzu tili bolghanlar iltimas qilsa bolidu, xenzuche oqughan yaki ana tili xenzu tili bolghan az sanliq milletler, jedweldiki millet terkibi dégen katekchige "Xenzu" dep yézishi shert, millet terkibini tekshürgende yene munasiwetlik höjjetlernimu qoshup ekélishi kérek" dégen bayanlarni bergen bolup, bu uqturush Uyghur ziyaliyliri arisida qattiq ghulghula peyda qilghan. Uyghurbiz torining 23-may künidiki xewiridin melum bolushiche, bu belgilimiler élan qilin'ghandin kéyin, sinna qatarliq tor béketliride tenqidi inkaslargha seweb bolghan.

Béyjing merkizi milletler uniwérsitétining dotsénti musteqil tetqiqatchi ilham toxti ependi radi'omizgha bu heqtiki qarashlirini bildürüp, bu uqturushtiki belgilimilerning "Milliy kemsitish siyasiti" ning ochuq-ashkara haldiki ipadisi ikenlikini tekitlidi. U sözide gerche ma'arip nazariti tordashlarning naraziliq inkasliridin kéyin eslidiki belgilimige tüzitish kirgüzgenlikini élan qilghan bolsimu, emma Uyghur aptonom rayoni dep atalghan bu zéminda Uyghur qatarliq yerlik milletlerning yéqinqi yillardin buyan téximu éghir bolghan milliy kemsitishke uchrawatqanliqini bildürdi.

Toluq bet