Uyghur we tibet aptonom rayonlirida 1500 neper "Milliy sotchi" terbiyelinidiken

Muxbirimiz irade
2018-04-12
Élxet
Pikir
Share
Print

Bügün xitayning "Xelq géziti" özining in'glizche xewerler sehipside mexsus xewer tarqitip, xitay aliy sotining Uyghur we tibet qatarliq az sanliq milletlerdin sotchi yétishtüridighanliqini bildürgen.

Xewerde mundaq déyilgen: "2015-Yili xitay aliy soti milliy rayonlarda milliy sotchilar kemchil bolush ehwaligha 5 yil ichide xatime bérish üchün döletlik milletler ishliri komitéti bilen hemkarliship bir qarar maqullighan. Hazirghiche, ikki terep hemkarliship, merkizi milletler uniwérsitéti, gherbiy-jenub milletler uniwérsitéti we gherbiy-shimal milletler uniwérsitétida 3 terbiyelesh bazisi qurup chiqidiken. Igilinishiche, hazirgha qeder Uyghur we tibet tillirida yaxshi sözleydighan 300 neper yerlik millet sotchisini yétishtürüp chiqqanliqi melum.

"Xelq géziti" ning xewiride Uyghur we tibetlerdin yétiship chiqqan sotchilarning öz millitini téximu yaxshi qanuniy xizmetler bilen teminlep qalmay, belki rayonda qanunning téximu yaxshi ijra qilinishigha kapaletlik qilidighanliqini ilgiri sürgen.

Halbuki, chet'ellerdiki Uyghur közetküchiler buning Uyghur élining hazirqi adettin tashqiri weziyiti bilen biwasite munasiwetlik ikenlikini bildürmekte. Ularning qarishiche, "Hazir xitay hökümiti Uyghur élida yüzminglap kishini 'yépiq terbiyelesh lagéri' gha qanunsiz halda qamiwalghanliqi sewebidin bu kishilerni bir terep qilishta sotchi yétishmeslik ehwali kélip chiqqan. Shunga xitay hökümiti téz sür'ette sotchi yétishtürüshke aldirimaqtiken."

Derweqe, yéqinda radiyomiz Uyghur élidiki yerlik orunlardin igiligen uchurlardimu yerlikte bezi kishilerge sot höküm qeghizining saqchixana teripidin bériliwatqanliqi, buninggha sotchi we sot sistémisining yétishmesliki seweb bolghanliqi ashkarilan'ghan idi.

"Xelq géziti" ning xewiride körsitilishiche, xitay aliy soti siyasiy ishlar bashqarmisining bashliqi shü jyashin bu rayonlardiki sotchi yétishmeslik ehwalini azaytish üchün ötken yilidin buyan xitay ölkiliri bilen sotchi teklip qilish we almashturush qatarliq programmilarni yolgha qoyghanliqini bildürgen.

Toluq bet