Misir musulman qérindashlar teshkilati xelqni omumiy naraziliq körsitishke chaqirdi

Muxbirimiz erkin
2013-08-15
Share

Misir musulman qérindashlar teshkilati peyshenbe küni chaqiriq élan qilip, prézidént muhemmet mursining qollighuchilirini basturushqa qarimay, dawamliq naraziliq bildürüshke chaqirdi.

Xewerlerdin melum bolushiche, misir herbiy da'irilirining mursichilarni basturush herikitide hazirghiche 500 din artuq adem ölgen. Lékin, musulman qérindashlar ölgenlerning 2200 din ashidighanliqi we 10 mingdin artuq adem yarilan'ghanliqini bildürmekte.

Musulman qérindashlar qollighuchilirini peyshenbe küni qahirediki el - iman meschitige yighilip, "Uruq - tughqanlirining öltürülüshige naraziliq bildürüsh" ke chaqirdi.

Prézidént obama peyshenbe küni misirdiki zorawanliqni qattiq tenqid qilip, amérika - misir arisida ötküzülidighan herbiy manéwirni bikar qildi. U, puqralar öltürülüwatqan ehwal astida hemkarliq élip bérilmaydighanliqini bildürdi.

Gérmaniye, en'gliye, firansiye qatarliq döletler misirda turushluq elchilirini chaqirtiwélip, özlirining endishisini ipadiligen.

Lékin, türkiye hazirgha qeder misirdiki basturushni eng qattiq tenqid qilghan dölet. Türkiye bash ministiri erdoghan basturushni "Intayin éghir qirghinchiliq" dégen we xewpsizlik kéngishini arilishishqa chaqirghan.

B d t kishilik hoquq aliy komissari nawi pillay, xelq'ara musteqil tekshürüsh élip bérishni telep qilghan.

Biraq, misir bash ministiri hökümetning mursi terepdarlirini basturghanliqini aqlap: heriket qollinishtin bashqa charimiz yoq, dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet