Xitay misirdiki Uyghur oqughuchilarni özige tartish üchün yene ömek ewetken

Muxbirimiz shöhret hoshur
2017-03-14
Share

Uyghur rayonidin misirgha ewetilgen atalmish wetenperwer diniy zatlar ömiki mushu ayning 9-küni misirdiki Uyghur oqughuchilar bilen uchriship, ulargha siyasiy-idiyiwi telim terbiye élip barghan.

Shiwétsiyediki sherqi türkistan teshwiqat merkizi teripidin süretlik tarqitilghan bu xewerdin melum bolushiche, bu uchrishishqa misirda oquwatqan Uyghur oqughuchilarning nahayiti az bir qismi qatnashqan. Xewerde déyilishiche, mezkur ömek Uyghur oqughuchilargha, muhajirettiki Uyghur milliy herikitige egeshmeslik, awaz qoshmasliq, bolupmu Uyghur rayonidiki weziyet heqqide éghiz achmasliq heqqide tenbih we terbiyelerge bergen. Ömektikiler yene, eger oqughuchilar xitay hökümiti sizip bergen siziqtin chiqmisa, ularning pasportini uzartish we yurtidiki uruq-tughqanlirini ziyaret qilish ishlirining ongushluq bolidighanliqi heqqide wede bergen. Xewerde ömek terkibide ürümchi aq meschitning imami abdushükür dégen kishiningmu barliqi tilgha élin'ghan.

Mezkur xewerde eskertilishiche, bu misirdiki Uyghur oqughuchilarning xitay teripidin tunji qétim qoynigha chaqirilishi emes؛ uningdin ilgirimu köp qétim misirdiki xitay elchixanisi bir qisim Uyghur oqughuchilarni yighip yighin échip, ularni heqni sözleshtin yeni xitaygha qarshi gep qilishtin tosqan.

Uyghur közetküchiler, yéqinqi yillardin béri xitayning bu xil qol tiqish heriketliri sewebidin misir we se'udi erebistan qatarliq döletlerde din oquwatqan Uyghur oqughuchilarning chong bir heq-naheq siniqigha duch kéliwatqanliqini ilgiri sürüshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.