Mudy guruhi xitayning krédit derijisini yene töwenlitilishi mumkin iken

Muxbirimiz jüme
2017-05-27
Share

Dunyadiki eng nopuzluq iqtisadiy inawet yeni krédit derijisini bahalash guruhi mudy shirkitidiki xadimlarning bildürüshiche, eger xitay yerlik hökümet we shirketlerning qerzini töwenlitish üchün iqtisadiy qurulmisida islahat élip barmisa, xitay iqtisadigha bérilidighan inawet nomuri yene töwenlitilishi mumkin iken.

Mudy guruhining meblegh salghuchilar orgini charshenbe küni xitayning iqtisadiy küchige qaritilghan krédit derijisini bir baldaq töwenlitip A1 ge chüshürgen.

Mezkur organ bu heqte élan qilghan bir parche uqturushta, bu xil töwenlitishining xitay iqtisadigha bolghan ishenchning yoqalghanliqini eks ettürghanliqi körsitilgen.

Charshenbe küni mezkur organ xitaydiki shirket qerz sommisi örlep, buning dölet iqtisadining örlesh poténsi'alini astilitishi mumkinliki sewebidin xitayning iqtisadiy küchige qaritilghan krédit derijisini eslidiki AA3 tin A1 ge töwenletken.

Xitay buning "Namuwapiq usullar" bilen chiqirilghan qara ikenlikini körsitip, qattiq naraziliq bildürgen.

Roytérsning jüme küni xewer qilishiche, mudy guruhidiki munasiwetlik xadimlar xitaygha jawaben eger xitay iqtisadiy qurulmisidiki islahat dégendek unum bermise, xitaygha bérilidighan krédit derijisining yene chüshürülüshi mumkinlikini bildürgen.

Xewerde neqil qilishiche, mudy guruhidiki yuqiri derijilik mes'ul xadim mariya diron xitayning shirket qerz sommisi yene örlishini astilitish üchün bir qatar tedbirlerni alghanliqini, emma bularning xitaydiki qerz örlesh éqimini tosup qalalmaydighanliqini bildürgen.

Mezkur organdiki krédit ölchimi belgilesh ornining mu'awin bashliqi lyu shyujunmu nöwette xitayning qerzining mudy guruhi kütkendinmu éghir derijide köpiyishi mumkinliki, eger shundaq bolsa, buning xitaygha bérilidighan krédit derijisige eks tesir körsitidighanliqini bildürgen.

CNN Ning xewerlirige qarighanda, 2008-yilidiki iqtisadiy krizistin kéyin xitayning yerlik hökümetliri we dölet igidarchiliqidiki shirketliri éghir qerzge tayinip, sheherlerni qurush, yollarni yasash, soda sahesige meblegh sélish we pul mu'amile bazirini kücheytish üchün tirishqan.

Netijide xitaydiki yerlik hökümetler, bolupmu dölet igidarchiliqidiki shirketlerning qerz sommisi hessilep artip mangghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet