Uyghur élide alte shirket ékologiyilik muhitni buzush bilen jazalandi

Xitay ékologiyilik muhitni qoghdashni kücheytishni teshebbus qilghandin buyan Uyghur aptonom rayoni da'irisi ichide bir qisim shirket we orunlarning ékologiyilik muhitni buzush ehwali tekshürülgen bolup, yéqinda alte shirket ékologiyilik muhit buzush bilen eyiblinip, ismi ashkara élan qilindi.

Shinjang gézitining xewer qilishiche, mezkur alte shirket ichide sanji tunggan aptonom oblastidiki shinjang tyenlong kanchiliq hessidarliq shirkiti, ili qazaq aptonom oblastidiki ili yéngi kömür kan gazi hessidarliq shirkiti, ili alahide hariqi hessidarliq shirkiti we bashqilar bar. Bu shirketler ichide üchi derhal ishni toxtitishqa buyrulghan, qalghan ikki shirketke bir milyon 500 ming yüendin 900 ming yüen'giche jerimane qoyulghan.

Közetküchilerning qarishiche, ékologiyilik muhit qanunini buzush bilen eyiblen'gen mezkur alte shirket peqet kölimi kichik shirketlerdin ibaret bolup, arqa tériki küchlük bolghan, biwasite döletke qaraydighan eng chong bir qisim shirketlerning muhit buzush ehwalliri jazaning sirtida qalghan.

Hazir ili wilayiti teweside élip bériliwatqan kömürdin gaz ishlepchiqirish pa'aliyitining küchiyishi bilen yerlik ahalilarda muhitning buzulushining éghirlishiwatqanliqi heqqide türlük inkaslar köpeymekte.