"Awan'gart mulazimet guruhi" ning qeshqerde meshiq bazisi qurghanliqi ashkarilandi

Muxbirimiz erkin
2018-05-07
Élxet
Pikir
Share
Print

"Wshin'gton pochtisi géziti" yéqinda xongkongni baza qilghan "Awan'gart mulazimet guruhi" ning qeshqerde meshiq bazisi qurup, xitaygha bixeterlik xadimlirini terbiyelep bériwatqanliqini ashkarilidi.

"Awan'gart mulazimet guruhi" iraq urushi dewride nami chiqqan "Qara su" shirkitining qurghuchisi érik prins teripidin teshkil qilin'ghan. "Washin'gton pochtisi géziti" ning ilgiri sürüshiche, qeshqerning jenubidiki melum bir jayda qurulghan bu meshiq bazisi béyjingdiki xelq'ara bixeterlik we mudapi'e mektipige qarashliq iken.

Xewerde, uning xitaydiki tunji xususiy bixeterlik shirkiti ikenliki, béyjingdiki xelq'ara bixeterlik we mudapi'e mektipining qeshqerdin bashqa yene yünnen qatarliq jaylardimu meshiq bazisi barliqini, hazir bu mektepning 25% pay chékini "Awan'gart mulazimet guruhi" ning kontrol qilidighanliqini bildürgen.

Xewerde bayan qilinishiche, 2014‏-yili künming poyiz istansisida yüz bergen pichaqliq hujumdin kéyin bu mektepning nishani térrorluqqa qarshi xadimlarni terbiyeleshke buralghan. Xewerde agan'gart mulazimet guruhi" ning Uyghur rayonida baza qurushining kishilik hoquq pa'aliyetchilirini bi'aram qiliwatqanliqi ilgiri sürgen. "Washin'gton pochtisi géziti" ning qeyt qilishiche, xelq'ara kechürüm teshkilatining xadimi nikolas békulin "Awan'gart mulazimet guruhi" ning Uyghur rayonida meshiq bazisi qurushi bu shirketning xitay hökümiti bilen bolghan alahide yéqin munasiwitini körsitidighanliqini tekitligen.

U, "Bu rayondiki bixeterlik wezipisi xitayning chégrasini qoghdash we az sanliq milletlerni assimilyatsiye qilishni qulaylashturmaq" dégen. Xewerde yene, amérikidiki Uyghur pa'aliyetchi roshen abbasning sözi neqil keltürilgen. U, "Amérika shirkitining xadimlirini ewetip, xitayning Uyghur medeniyitini yoqitishini qollishi heqiqeten kishini epsuslanduridu" dégen.

"Washin'gton pochtisi géziti" ning ilgiri sürüshiche, érik prinsning herikiti amérika hökümitidiki alaqidar emeldarlarni bi'aram qilishqa bashlighan. Xewerde, uning herikiti yene amérikining menpe'etige uyghunmu-emesmu?, dégen so'allarni peyda qilghanliqi, lékin érik prinsning bu heqtiki gumanlarni ret qilghanliqini bildürgen.

Toluq bet