Бәш рәһбири кадир “муқимлиқ хизмитини яхши ишлимәслик” сәвәби билән чарә көрүшкә учриған

Мухбиримиз үмидвар
2017.04.30

Йеқинда үрүмчи шәһири даирисидә бир қисим кадирлар муқимлиқ хизмитини әмәлийләштүрүштә мәсулийитини йетәрлик ада қилалмиғанлиқи сәвәби билән чарә көрүш җазасиға учриған.

Үрүмчи шәһәрлик партком интизам тәкшүрүш комитети үрүмчи шәһиридики муқимлиқ хизмитини яхши ишлимигәнлики сәвәбидин җаза бәргән бәш нәпәр рәһбирий кадирниң исмини вә җазалиниш сәвәбини көрсәткән.

“үрүмчи кәчлик гезити”ниң бу һәқтики учуридин мәлум болушичә, җазаға учриған мәзкур бәш кадирниң бир нәпири хитай, қалған төт нәпири уйғур болуп,буларниң ичидә үрүмчи шәһәрлик 3-оттура мәктәпниң хитай мәктәп башлиқи билән уйғур партийә секретари“муқимлиқни қоғдаш хизмитигә әһмийәт бәрмигән”, “мәктәпкә кирип-чиққанларни қаттиқ тәкшүрмигән” дегәндәк әйибләш билән партийә ичидә агаһландуруш, мәмурий җәһәттин чарә көрүш хатириси турғузуш җазасиға учриған.

Қалған үч нәпәр уйғур кадирниң һәммиси үрүмчи шәһиригә қарашлиқ бәзи идариләрниң мәсуллири болуп, улар йәнә һәм айрим-айрим һалда дөңкөврүк мәсчити, яңхаң мәсчити вә башқа мәсчитниң башқуруш комитетлириниң мудирилиқ вәзипилириниму атқурған икән. Улар охшашла “муқимлиқни қоғдаш хизмитигә әһмийәт бәрмигән”,“мәсулийитини толуқ ада қилмиған”, “мәсчитниң аманлиқ башқуруш хизмитини йетәрлик ишлимигән” дегәндәк әйибләшләр билән партийә ичидә агаһландуруш вә мәмурий җәһәттин чарә көрүш хатириси турғузуш җазасиға учриған.

Учур васитилиридин мәлум болушичә, техи йеқинда хотәндиму 97 кадирму муқимлиқни қоғдаш мәсилилири түпәйлидин җазалашқа учриған болуп, уларниң мутләқ көп қисми уйғур кадирлар иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.