Murat nasirofning ayali uning ölüm sewebi heqqide toxtaldi

1990-Yillarning axiri we 2000-yillarning bashlirida rusiyege, jümlidin musteqil döletler hemdostluqigha keng tonulghan Uyghur naxsha cholpini, kompozitor murat nasirofning tuyuqsiz ölümining on yilliqi munasiwiti bilen, rusiye metbu'atining ziyaritini qobul qilghan uning ayali nataliya boyko metbu'atlarda tarqalghan murat “Zeherlik chékimlik sewebidin özini öltürüwalghan” dégen gep-sözlerni inkar qildi.

Rusiyening “Dni.Ru” torining maqaliside körsitilishiche, murat nasirofning ayali nataliya metbu'atlarda peyda bolghan: “U, zeherlik chékimlik chekken, ene shuning tesiridin özini öltürüwaldi” dégen uchurlarni ret qilip, özining “Öz éri bolghan muratni eng yaxshi bilidighanliqi, uning héchqachan zeherlik chékimlik chekmigenliki we chekmeydighanliqi”ni tekitligen.

U muratning yashashni arzu qilidighanliqini, biraq kéyinki waqitlarda uning psixikisida özgirish bolghan bolsimu, emma buning zeherlik chékimliktin emeslikini eskertken.

Moskwada neshr qilin'ghan besh naxsha albomining aptori, asasliq rus tilida naxsha éytip meshhur bolghan murat nasirof 2007-yili, 1-ayning 19-küni özining moskwadiki öyining balkonidin chüshüp kétip, 38 yashta hayattin ayrilghandin kéyin, uning ölümining sewebliri heqqide izchil türde her xil qiyaslar we uchurlar dawamliship kelgen idi. Uning ölümining sewebi hazirghiche éniqsiz we sirliq halda qalghanliqi melum.