Roxéngyaliq musulman musapirlar heqqidiki xelq'ara yighinda chong ilgirilesh bolmidi

Muxbirimiz erkin
2015-05-29
Share

29‏-May, taylandning bangkok shehiride ötküzülgen roxéngyaliq musulmanlar heqqidiki xelq'ara yighin ‏axirlashqan bolsimu, lékin yighinda héchqandaq chong ilgirilesh bolmidi. Yighinda bérma wekili özige qaritilghan tenqidlerni ret qilip, bérmini tenqid qilish krizsni chongqurlashturushtin bashqa héchnémige esqatmaydu, dep agahlandurghan.

Jüme küni ötküzülgen yighin'gha amérika, yaponiye, malayshiya, hindonéziye, bérma qatarliq 17 dölet wekilliri ishtirak qilghan. Xelq'ara köchmenler teshkilatining bash diréktori willi'am lasi swing, "Dawamliq söhbet élip bérish mesiliside hasil qilghan ortaq pikir yighinning eng zor netijisi" dédi.

Yighinda, b d t ning köchmenler mesilisi mu'awin aliy komissari wolkér türk, roxingyaliq musulman musapirlar mesilisini keltürüp chiqarghan seweb hel qilinmisa, buning héchqandaq netijisi bolmaydighanliqini bildürgen.

U " Bu, bérmining öz xelqige qarita toluq mes'uliyetni üstige élishini telep qilidu. Axirqi pilan ularning wetendashliqigha kapaletlik qilish"dégen. Biraq yighinda, bérma wekili tin lin b d t musapirlar emeldarining sözige qarshi chqqan. U "Bashqilarni nishan'gha élish héchnémige esqatmaydu. Bizni héch yerge élip barmaydu" dégen.

Bérma hökümiti roxéngyaliq musulmanlarning bérma wetendashliqini izchil ret qilip ularni bén'galliq köchmenler, dep qarap kelgen. Bérma hökümitining bésimi we radikal buddistlarning zorawanliq herikiti roxéngyaliq musulmanlarni chet'elge qéchishqa mejburlap, yéqinda köchmenler krizisini peyda qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet