Мухбирларни қоғдаш җәмийити: “аз дегәндә 30 нәпәр уйғур мухбир вә тәһрир тутқунда”

Мухбиримиз шөһрәт һошур
2019.03.13
Share on WhatsApp
Share on WhatsApp

Хәлқара мухбирларни қоғдаш җәмийитиниң тор бетидә бүгүн елан қилинған бир мақалида уйғур районида 2016- вә 2018-йиллири арисида йәрлик ахбарат-нәшрият орунлирида ишләйдиған аз дегәндә 30 нәпәр тәһрир вә мухбирниң тутқун қилинғанлиқи тилға елинди.

Хитай даирилириниң ахбаратни контрол қилиш арқилиқ өзлири садир қиливатқан мәсилиләрниң җавабкарлиқидин оңушлуқ һалда қечип келиватқанлиқи пакитлар билән оттуриға қоюлған мәзкур мақалида уйғур районида 2017-йили лагер тәсис қилинғандин буян учур елишниң һәссиләп қийинлашқанлиқи әскәртилгән.

Мәзкур җәмийәтниң бейҗиңда турушлуқ мухбири ерик ху тәрипидин йезилған бу мақалида апторниң лагердики тутқунлар һәққидә мәлумат елиш үчүн уйғур аптоном районлуқ ахбарат ишханисиға телефон қилғанлиқи, телефонни қобул қилған хадимниң апторниң соалиға җаваб беришни қопаллиқ билән рәт қилғанлиқи вә шундақла апторни бу һәқтә қайта соал соримаслиққа буйруқ қилғанлиқи йезилған.

Мақалида баян қилинишичә, икки йилдин буян уйғур райондики сақчи орунлириниң мутләқ көпи чәтәлдин кәлгән телефонларни қобул қилмайдиған болувалған. Мақалидә уйғур районида аз дегәндә 30 нәпәр тәһрир вә мухбирниң тутқун қилинғанлиқи һәққидики бу учурға “хитайға ярдәм” (China Aid) тәшкилатиниң тор бетини мәнбә қилип көрсәткән. Мәзкур мәнбәдә абдуқадир җалалидин, ялқун рози, абдурахман әбәй, абдукерим рахман, илһам вәли, әркин турсун қатарлиқ лагерларға қамалған 124 нәпәр һәр саһәдики уйғур уйғур зиялийлириниң тизимлики елан қилинған.

Хәлқара мухбирларни қоғдаш җәмийитиниң җүмә күни “8-март хәлқара аяллар байрими” мунасивити билән елан қилған баянатида дуня бойичә тутқундики 251 мухбирниң 33 нәпириниң аял икәнлики вә булардин 3 нәпириниң тутқундики гүлмирә имин, атикәм рози вә чимәнгүл авут қатарлиқ уйғур аял сәрхилләр икәнлики билдүрүлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт