Muxbirlarni qoghdash jem'iyiti: "Az dégende 30 neper Uyghur muxbir we tehrir tutqunda"

Muxbirimiz shöhret hoshur
2019-03-13
Élxet
Pikir
Share
Print

Xelq'ara muxbirlarni qoghdash jem'iyitining tor bétide bügün élan qilin'ghan bir maqalida Uyghur rayonida 2016- we 2018-yilliri arisida yerlik axbarat-neshriyat orunlirida ishleydighan az dégende 30 neper tehrir we muxbirning tutqun qilin'ghanliqi tilgha élindi.

Xitay da'irilirining axbaratni kontrol qilish arqiliq özliri sadir qiliwatqan mesililerning jawabkarliqidin ongushluq halda qéchip kéliwatqanliqi pakitlar bilen otturigha qoyulghan mezkur maqalida Uyghur rayonida 2017-yili lagér tesis qilin'ghandin buyan uchur élishning hessilep qiyinlashqanliqi eskertilgen.

Mezkur jem'iyetning béyjingda turushluq muxbiri érik xu teripidin yézilghan bu maqalida aptorning lagérdiki tutqunlar heqqide melumat élish üchün Uyghur aptonom rayonluq axbarat ishxanisigha téléfon qilghanliqi, téléfonni qobul qilghan xadimning aptorning so'aligha jawab bérishni qopalliq bilen ret qilghanliqi we shundaqla aptorni bu heqte qayta so'al sorimasliqqa buyruq qilghanliqi yézilghan.

Maqalida bayan qilinishiche, ikki yildin buyan Uyghur rayondiki saqchi orunlirining mutleq köpi chet'eldin kelgen téléfonlarni qobul qilmaydighan boluwalghan. Maqalide Uyghur rayonida az dégende 30 neper tehrir we muxbirning tutqun qilin'ghanliqi heqqidiki bu uchurgha "Xitaygha yardem" (China Aid) teshkilatining tor bétini menbe qilip körsetken. Mezkur menbede abduqadir jalalidin, yalqun rozi, abduraxman ebey, abdukérim raxman, ilham weli, erkin tursun qatarliq lagérlargha qamalghan 124 neper her sahediki Uyghur Uyghur ziyaliylirining tizimliki élan qilin'ghan.

Xelq'ara muxbirlarni qoghdash jem'iyitining jüme küni "8-Mart xelq'ara ayallar bayrimi" munasiwiti bilen élan qilghan bayanatida dunya boyiche tutqundiki 251 muxbirning 33 nepirining ayal ikenliki we bulardin 3 nepirining tutqundiki gülmire imin, atikem rozi we chimen'gül awut qatarliq Uyghur ayal serxiller ikenliki bildürülgen idi.

Toluq bet