Uyghur élida ündidarda bashqilargha namaz oqushni ögetken bir tunggan 2 yilliq késilgen

Muxbirimiz erkin
2017-09-11
Élxet
Pikir
Share
Print

Uyghur aptonom rayonining ili oblastida özining ündidar topidikilerge namaz oqushni ögitip qolgha élin'ghan bir tunggan diniy zat bu yil 3‏-ayda ili oblastliq sot mehkimisi teripidin 2 yilliq qamaq jazasigha höküm qilin'ghan.

Xitayda chiqidighan "Yer shari waqit géziti" ning düshenbe küni ashkarilishiche, 49 yashliq xung shiké isimlik bu tunggan puqrasi 2016‏-yili 6‏-ay we 8‏-ayda ayrim-ayrim ikki ündidar topi qurup, her bir toptiki birer yüzdek top ezalirigha diniy sawat bergen we namaz oqushni ögetken. 

Xewerde, xung shikéning yuqiriqi herikiti seweblik 2016‏-yili 24‏-awghust küni qolgha élin'ghanliqi qeyt qilin'ghan bolsimu, biraq uning ili oblastidiki konkrét turushluq orni tilgha élinmighan. Xitay hökümiti Uyghur ilida yéqinqi yillardin béri diniy pa'aliyetlerni kontrol qilishni izchil kücheytip, tor yaki bashqa ijtima'iy alaqe wastilirida diniy tebligh qilish, diniy sawat bérish, diniy kitablarni tonushturush, diniy mezmunlarni munazire qilishni pütünley chekligen.

Xitay hökümiti 2015‏-yili jinayi ishlar qanunigha tüzitish kirgüzüp, yuqiriqi heriketlerni torda élip bérish qanunsiz "Jinayi qilmish" dep élan qilghan. Biraq xitayning bu herikiti kishilik hoquq teshkilatlirining tenqidige uchrighan. Ular buning diniy erkinlikni boghup, nurghun kishining naheq jazalinishigha seweb bolidighanliqini ilgiri sürgen idi. 

"Yer shari waqti géziti" ning ashkarilishiche, xitay da'iriliri xung shikéni "Gheyriy diniy sorunda diniy tebligh we diniy sawat bergen, normal diniy pa'aliyetler heqqidiki memuriy buyruqqa xilapliq qilip, parakendichilik peyda qilghan. Diniy ishlar bashqurush qanunigha xilapliq qilip, jem'iyetke ziyan salghan," dégen jinayetler bilen eyibligen.

Toluq bet