Хитай һөкүмити нәнси пелоси ханимниң "уйғур һәрикити" тәшкилати билән сөһбәт өткүзгәнликини әйиблигән

Мухбиримиз җәвлан
2021-03-03
Share

"җумһурийәт дуняси" (Republicworld) ториниң 2-март елан қилған хәвиридә ейтилишичә, хитай һөкүмити америка авам палатасиниң башлиқи нәнси пелоси ханимниң "уйғур һәрикити" тәшкилати билән сөһбәт өткүзгәнликини әйибләп: "америка кишилик һоқуқ мәсилисини баһанә қилип, хитайниң шинҗаң сияситигә арилашти," дегән.

1-Март күни нәнси пелоси ханим вашингтон шәһиридики "уйғур һәрикити" тәшкилатиниң тәклипини қобул қилип, улар билән уйғурлар мәсилиси һәққидә тор сөһбти өткүзгән болуп, йиғин қатнашқучилири нәнси пелоси ханимға йеқиндин бери уйғур районида техиму еғирлап кәткән кишилик һоқуқ дәпсәндичиликини аңлатқаниди.

Хитай ташқи ишлар министерлиқиниң баянатчиси ваң венбин хитайниң 2-март күнидики ахбарат елан қилиш йиғинида нәнси пелоси ханимни әйбләп: "америка хитайдики кишилик һоқуқ мәсилисини очуқ оттуриға қоюп туруши керәк, дәйду. Әмма америка алди билән әмәлий тәдбир қоллинип, өзиниң ичкий қисмидики кишилик һоқуқ әһвалини яхшилиши керәк," дегән.

Анализчиларниң қаришичә, хитай һөкүмити уйғурларға йүргүзүп келиватқан җинайәтлирини инкар қилип келиватқан болсиму, әмма җинайи испатлири давамлиқ ашкарилинип кәлмәктә икән. Җаза лагерлиридики қийин-қистақлар, болупму аяллар учриған вәһший зораванлиқ, мәҗбурий әмгәк арқилиқ уйғурларниң турмушини вәйран қилиш, нопусини азлитиш вә ассимилатсийә қилиш қатарлиқлар буниң испати болуп, америкадики 3-номурлуқ шәхс болған нәнси пелоси ханимниң бу әһваллардин хәвәр тепиши вә хитайға қарши ипадә билдүрүши, хитай һөкүмитини қаттиқ биарам қилған болуши мумкин икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт